« Ինձ համար ընդունելի է նախագծի հեղինակի բերած այն հիմնավորումը, որ այս օրենքի մեջ փոխհատուցման չափերը ընտրվել են տարիներ առաջ, և բնականաբար այդ գումարի չափը, որը նախկինում ողջամիտ կարող էր լինել որպես հասցված վնասի փոխհատուցում, գուցե այժմ այլևս ողջամիտ չէ, չափազանց փոքր է, եթե համեմատենք այն վնասին, որը հասցվել է անձին, նրա բարի համբավին կամ վիրավորանքի պարագայում նրա արժանապատվությանը։ հետևաբար զուտ այս տրամաբանությունից ելնելով, որ 20 տարի առաջ այդ գումարը այլ նշանակություն կարող էր ունենալ, իսկ այժմ այլ նշանակություն, արդեն իսկ ինձ համար բավական ուժեղ արգումենտ է քննարկումը սկսելու համար։ Բայց այ թե որքանով պետք է բարձրացնենք, արդյոք հնգապատիկը ողջամիտ է, թե այնուամենայնիվ ներկայիս չափից բարձր, բայց ոչ այդքան, սա արդեն կքննարկենք լիագումար նիստերի դահլիճում» , – «Առաջին լրատվական»-ի հետ զրույցում ասաց ԱԺ «Իմ քայլը» խմբակցության պատգամավոր Մարիա Կարապետյանը։
Հիշեցնենք, որ վիրավորանքի և զրպարտության համար փոխհատուցման չափի հնգապատկման նախագիծը ԱԺ պետաիրավական հարցերի մշտական հանձնաժողովում ստացել է դրական եզրակացություն։
