Միխեիլ Սահակաշվիլին հայտարարել է, որ պատրաստ է դառնալ Վրաստանի վարչապետ, բայց սահմանափակ ժամկետով՝ ընդամենը երկու տարով: Նա նաև շեշտել է, որ Վրաստան կժամանի միայն այն դեպքում, եթե դա երկրում «առճակատման և անկարգությունների» պատճառ չի դառնա:
Ուկրաինայում գտնվող Վրաստանի նախկին նախագահը տեսաուղերձ է տարածել, որում բացատրել է, թե ինչպես է տեսնում իր մասնակցությունը Վրաստանի քաղաքական կյանքում, եթե ընդդիմությունը հաղթի հոկտեմբերի 31-ին կայանալիք խորհրդարանական ընտրություններում, գրում է «Նովոստի-Գրուզիան»:
«Ազգային շարժում» կուսակցությունը և մի շարք այլ մարդիկ ինձ դիմել են կառավարության ղեկավար, Վրաստանի վարչապետ դառնալու հարցով: Ես շատ եմ մտածում այդ մասին և ուզում եմ ասել, որ պատրաստ եմ ստանձնել այդ գործառույթը, բայց ոչ իշխանության գալու կամ այն պատճառով, որ տխրում եմ առանց իշխանության… Ուզում եմ ասել, որ ես վարչապետի պաշտոնը կզբաղեցնեմ ոչ լրիվ ժամկետով՝ առավելագույնը երկու տարով, քանի որ այդ երկու տարին բավական կլինի երկիրը ճահճից դուրս բերելու ու արագ առաջ շարժվելու համար: Եվ ես դրանում համոզված եմ:
Ինձ շատ են հարցնում, թե երբ եմ գալու Վրաստան: Ես կգամ այնպիսի պայմաններում, երբ դա որևէ ձևով առճակատում և անկարգություններ չի առաջացնի: Քանի որ շատ կարևոր է, որ ամեն ինչ խաղաղ լինի, քանի որ ժամանակին ես խաղաղ ճանապարհով փոխանցեցի իշխանությունը, և իսկապես չեմ պատրաստվում իշխանության գալ անկարգությունների միջոցով»,- ասել է Սահակաշվիլին:
