Թուրքիայի ԱԳՆ-ն մեղադրել է ինքնահռչակ Կոսովոյին միջազգային իրավունքի խախտման մեջ` Երուսաղեմում դեսպանություն բացելու նրա որոշման կապակցությամբ։
Իսրայելի վարչապետ Բենյամին Նեթանյահուն ուրբաթ օրը հաղորդեց, որ Սերբիան իր դեսպանատունը կտեղափոխի Երուսաղեմ մինչև 2021-ի հուլիս ամիսը, իսկ մինչ այդ այնտեղ ներկայացուցչություն կբացի՝ դառնալով Երուսաղեմում դեսպանություն բացող առաջին եվրոպական երկիրը: Կոսովոն, որի հետ Իսրայելը պայմանավորվել է դիվանագիտական հարաբերություններ հաստատել, նույնպես իր դեսպանությունը կտեղակայի Երուսաղեմում: Այս որոշումներն ընդունվել են Միացյալ Նահանգների միջնորդությամբ:
«Հիասթափեցնող է այն, որ Կոսովոյի իշխանություններն այնպիսի քայլ են քննարկում, որը միջազգային իրավունքի բացահայտ խախտում կլինի», – ասված է Թուրքիայի ԱԳՆ հայտարարության մեջ:
Նշվում է, որ Թուրքիան առաջիններից մեկն է, որ ճանաչել է Կոսովոն և մեծ աջակցություն է ցուցաբերում նրա միջազգային ճանաչմանն ուղղված ջանքերին:
