Արցախի Անկախության 29-րդ տարեդարձի կապակցությամբ «Առաջին լրատվական»-ի հետ զրույցում ԱԺ «Իմ քայլը» խմբակցության պատգամավոր Արուսյակ Ջուլհակյանն ասաց․ «Պետք է նշեմ՝ միայն անկախ լինելու դեպքում է, որ իրեն քաղաքական համարող ազգը, որն ունի հասուն քաղաքական միտք, կարողանում է սեփական տարածքում լիարժեք կերպով ապահովել իր անվտանգությունը, անկախությունը հենց դրա երաշխիքն է։ Երբ չկա անկախություն, լիակատար անվտանգության մասին խոսել մենք չենք կարող, քանի որ մեր պատմական դառը փորձը ցույց է տվել, որ, լինելով տարբեր պետությունների կազմերում, մենք երբեք չենք եղել պաշտպանված, և ժամանակ առ ժամանակ մեր ազգի հետ տեղի ունեցած կոտորածները, Ցեղասպանությունը եղել են անկախ պետություն չունենալու հետևանքով։ Դա է պատճառը, որ անկախությունը, որ հիմա մենք ունենք, պետք է փայփայենք և ամեն ինչ անենք այդ անկախությունն ու ինքնիշխանությունը պաշտպանելու և շարունակական դարձնելու համար։
Այս տեսանկյունից ես շատ եմ կարևորում այն, որ ժամանակին եղել են հայեր, որոնք կարևորել են պետություն ունենալու անհրաժեշտությունը, և շատ լավ է, որ արվել է ամեն ինչ, որպեսզի մենք 20-րդ դարի սկզբին անկախանանք։ Ցավոք սրտի, այն ժամանակ երկար չենք կարողացել պահպանել պետականությունը՝ ինչ-ինչ պատճառներից ելնելով, որի մասին հիմա հարկ չեմ համարում խոսել։ Բայց պետք է նշեմ, որ հայ ազգի քաղաքական միտքը հասունացել էր այնքան, որ 20-րդ դարի վերջում մենք կարողացել ենք կռիվ տալ անկախություն ձեռք բերելու համար և այն արյան գնով պաշտպանել, այդ թվում՝ Արցախյան շարժման միջոցով, Արցախն անկախացնելու միջոցով»:
Մանրամասները՝ տեսանյութում։
