Օգոստոսի 26-ին Մոսկվայում Ռուսաստանի և Ադրբեջանի արտգործնախարարներ Սերգեյ Լավրովի և Ջեյհուն Բայրամովի համատեղ մամուլի ասուլիսի ընթացքում կողմերը անդրադարձել են Արցախի հակամարտության կարգավորման հարցին:
ՌԴ ԱԳ նախարար Սերգեյ Լավրովը ասել է, որ համանախագահների համար անընդունելի է Արցախի հարցով բանակցային կազմը փոխելու փորձերը: Նա մասնավորապես նշել է, որ արցախյան հակամարտության կարգավորման հարցում պետք է առաջնորդվել միջազգային հանրության, այդ թվում՝ ՄԱԿ Անվտանգության խորհրդի ընդունած բանաձևով, ինչպես նաև հաջորդ փուլերում մշակված բանակցային գործընթացի չափորոշիչներով, որոնք մշակվել են ԵԱՀԿ-ի շրջանակներում:
Լավրովի խոսքով՝ այս ընթացքում մի շարք փաստաթղթեր են մշակվել ԵԱՀԿ ՄԽ համանախագահության, ինչպես նաև Հայաստանի և Ադրբեջանի հետ՝ մոտեցումների տարբեր աստիճանի դետալացմամբ, որոնք, սակայն, միասնական են գլխավոր նպատակում՝ լուծել խնդիրը այն սկզբունքների հիման վրա, որոնք ամրագրված են ՄԱԿ կանոնադրությունում, ինչպես նաև ԵԱՀԿ Հելսինկյան եզրափակից ակտում:
ՌԴ ԱԳ նախարարը հավելել է, որ կան մի շարք փաստաթղթեր, որոնց տակ Հայաստանի ու Ադրբեջանի նախագահների, ԱԳ նախարարների, ինչպես նաև համանախագահների ստորագրություններ են, որոնցում, թեկուզև ընդհանուր գծերով, բայց ամրագրված է կարգավորման համալիր մոտեցումը, ինչն էլ պետք է բերի խնդրի վերջնական լուծմանը:
Հարցին՝ արդյոք պահպանվում է ձեռք բերված համաձայնությունների հիմքը, և ինչպես բարձրացնել դրա արդյունավետությունը, Լավրովը պատասխանել է. «Եվս մեկ անգամ ասում եմ, որ բավականին լուրջ հիմք է մշակվել: Տխուր կլիներ կորցնել այդ հիմքը: Ցավոք, մենք նման փորձեր տեսել ենք, այդ թվում՝ բանակցային կողմը փոխելու փորձեր, ինչը համանախագահների համար անընդունելի է, մենք հրապարակայնորեն հայտարարել ենք այդ մասին»:
ՌԴ ԱԳ նախարարը ընդգծել է, որ պետք է բացառել պատահարների գրանցումը արդեն ոչ միայն Ղարաբաղին կից շրջաններում, այլ հայ-ադրբեջանական սահմանին: «Հույս ունենք, որ այլևս չի կրկնվի այն, ինչ տեղի ունեցավ հուլիսին»,-հավելել է նախարարը:
