«Մինչև օրս իմ դեմ դատական հայցեր են ներկայացրել ու շարունակում են ներկայացնել բոլոր նրանք, ովքեր ուղղակի կամ անուղղակի կերպով կապված են նախկին հանցավոր ու կոռուպցիոն իշխանությունների հետ։ Այդ ցանկը բավական երկար է, և «Լիդիան Արմենիան» գալիս է լրացնելու նախկինների ու նրանց հետ կապվածների այդ ցուցակը։ Եվ դա պատահական չէ»,- «Առաջին լրատվական»-ի հետ զրույցում ասաց ԱԺ անկախ պատգամավոր Արման Բաբաջանյանը։
Նշենք, որ այսօր հայտնի դարձավ, որ «Լիդիան Արմենիա» ընկերությունը զրպարտության համար հայցադիմում է ներկայացրել Արման Բաբաջանյանի դեմ։ Հայցի առարկա է հանդիսացել վերջինիս կողմից իր հարցազրույցներից մեկում արված դիտարկումները «Լիդիանի»՝ Ամուլսարի ծրագրի վերաբերյալ։ Բաբաջանյանը, մասնավորապես, ծրագրի մասին խոսելիս օգտագործել է «…կոռուպցիոն և հանցավոր ճանապարհով ձեռք բերված թույլտվություններ», «…նախկին կոռուպցիոն շղթաներով ամբողջությամբ կազմակերպած այդ հանցավոր գործարքը՝ Ամուլսարի, «Լիդիանի»» և նման արտահայտություններ: Ըստ «Լիդիանի»՝ այդ արտահայտությունները զրպարտություն են, ոչ մի աղերս չունեն իրականության հետ և նպատակ ունեն արատավորել ընկերության գործարար համբավը:
Բաբաջանյանը մեզ հետ զրույցում ասաց, որ «Լիդիան Արմենիա»-ի ներկայացրած հայցադիմումի իրավական մասին կանդրադառնա առաջիկայում, սակայն, ինչպես նախկինում, այնպես էլ ու առավել ևս այսօր ինքը «Լիդիան Արմենիան» ընկերությունը համարում է որպես նախկին արատավոր, կոռուպցիոն համակարգի ծնունդ, որովհետև այլ պայմաններում, իրավական պետության ու օրենքի գերակայության պայմաններում «Լիդիան Արմենիան» չէր կարող ստանալ այն թույլտվություններն ու արտոնությունները, որոնցով ցանկանում է շահագործել հանքը։ «Այսպիսով, իմ դեմ հայցադիմում ներկայացնելով՝ «Լիդիան Արմենիան» առնվազն անուղղակիորեն ապացուցում, մատնում է իր կապը նախկին իշխանությունների հետ։ Իսկ դա ցավալի է ոչ միայն ինքին որպես փաստ, այլ նաև որպես այն իրողության վկայություն, որ տևական ժամանակ է՝ նախկին իշխանություններն ու նրանց հետ փոխկապակցված սուբյեկտները իրենց, իրենց վերարտադրության համար հնարավորություններ են տեսնում։ Իսկ դա իր հերթին խոսում է գործող իշխանության թուլության ու ապիկարության մասին։ Բայց այս զարգացումները իրականում շատ դրական են, հուսամ՝ դրանք արագացնում են այն գործընթացները, որոնք անխուսափելիորեն տեղի են ունենալու Ամուլսարի առնչությամբ։ Իսկ դրանք հանգեցնելու են այն իրողությանը, որ Ամուլսարը սար է մնալու, «Լիդիան Արմենիան» չի շահագործելու հանքը»,- ասաց պատգամավորը՝ հավելելով, որ դրա փոխարեն «Լիդիան Արմենիան» դեռ պետք է պարզաբանի, թե ինչ հանցավոր սխեմաների ու գործարքների միջոցով է կարողացել իր համար շահեկան որոշումներ ստանալ նախկին իշխանության ամենակարկառուն դեմքերից՝ սկսած Ռոբերտ Քոչարյանից ու Սերժ Սարգսյանից, վերջացրած Տիգրան Սարգսյանով ու Հովիկ Աբրահամյանով։ «Իսկ մինչ այդ ես շարունակելու եմ աջակցել Ամուլսարի դեմ պայքարող ազնիվ ու նվիրյալ քաղաքացիներին, որոնց ամեն գնով ցանկանում է լռեցնել «Լիդիան Արմենիան»։ Իմ դեմ դատական հայց ներկայացնելով՝ վերջինս ցույց է տալիս, որ փաստորեն ցանկանում է լռեցնել ոչ միայն պայքարող ակտիվիստներին, այլ նաև քաղաքական ուժերին ու գործիչներին։
Չի ստացվելու։ Ամուլսարը սար է մնալու։ Կհանդիպենք դատարանում»,-եզրափակեց Արման Բաբաջանյանը։
