«Հայաստանում հրդեհները, համեմատած այլ երկրների հետ, շատ մեծ չափերի չեն հասնում։ Վերջին 10 տարվա ընթացքում այրվել է 1964 հա անտառային տարածք, իսկ 2010 թ-ին 2-3 դեպք է գրանցվել»,- այսօր լրագրողների հետ հանդիպմանը հայտարարեց «Հայանտառ» ՓԲԸ գլխավոր անտառապետ Ռուբեն Պետրոսյանը։ Նա նաև հայնտեց, որ ՄԱԿ-ի ծրագրի շրջանակներում փորձում են արագ արձագանքման խմբեր ստեղծել։
Կլիմայական փոփոխության ազգային համակարգող Արամ Գաբրիելյանի խոսքով՝ կլիմայի փոփոխությունը Հայաստանի վրա անդրադառնում է մի շարք ձևերով՝ բարձրացնում է երաշտների և չոր եղանակների ինտենսիվությունը. «Ինչ խոսք, հրդեհներ միշտ էլ եղել են, բայց երաշտի հաճախականությունը նպաստում է տարածքների ավելի մեծ ընդգրկմանը։ Ջերմաստիճանի բարձրացման հետ անտառի ստորին հատվածն է բարձրանում, այսինքն՝ զոնաներն են փոխվում»։ Նա նաև հավելեց, որ ԱԺ-ում այժմ քննարկվում է դաշտերի այրման արգելքի մասին օրենքի նախագիծը, որտեղ լրացում է կատարվելու, և իրենք հուսով են, որ սեպտեմբեր-հոկտեմբեր ամիսներին այն կընդունվի։
Կլիմայի փոփոխության ՄԱԿ-ի զարգացման ծրագրի համակարգող Դիանա Հարությունյանն իր խոսքում նշեց, որ կլիմայի փոփոխության ներքո Սյունիքի մարզի անտառները համարվել են ամենախոցելիները, և Սյունիքի անտառներում իրենք աշխատում են ինչպես սարքավորումներ տրամադրելով, այնպես էլ անտառշինական ծրագրերում հրդեհի նկատմամբ նախապատրաստվածության աստիճանը բարձրացնելով։
