«Առաջին լրատվական»-ը սկսում է հաղորդումների շարք՝ նվիրված Հայաստանի Անկախության տոնին։ «Առաջին լրատվական»-ի հյուրն է Գերագույն խորհրդի պատգամավոր Շահեն Պետրոսյանը։
Հիշո՞ւմ եք այն մթնոլորտը, երբ ընթերցվեց Անկախության հռչակագիրը․ «Առաջին լրատվական»-ի հարցին Շահեն Պետրոսյանը պատասխանեց․ «Այո, ես ինքս մասնակցել եմ Անկախության հռչակագրի ստեղծմանը՝ այդ աշխատանքային խմբում ես էլ եմ եղել»։
Ինչի՞ վրա էիք ավելի շատ վիճում՝ բովանդակությա՞ն, թե՞ ձևակերպումների․ «Առաջին լրատվական»-ի հարցին Շահեն Պետրոսյանը պատասխանեց․ «Ճիշտն ասած՝ ես միակն եմ, որ դեմ եմ քվեարկել Անկախության հռչակագրին, որովհետև ես դեմ էի 11-րդ կետին, որ Եղեռնի հետ կապված այդ նախադասությունը մտնի Անկախության հռչակագրի մեջ։ Ես պահանջում էի, որ Ցեղասպանության հետ կապված հարցը ընդունեինք առանձին փաստաթղթով ու չմտցնեինք Անկախության հռչակագրի մեջ»։
Իսկ կային քաղաքական կրքեր, որոնք մտավախություն էին առաջացնում․ «Առաջին լրատվական»-ի հարցին Շահեն Պետրոսյանը պատասխանեց․ «Ճիշտն ասած՝ չկար, որովհետև չնայած նրան, որ հանձնաժողովը խայտաբղետ էր, բոլորը եկել էին կոնսենսուսի, ինչը չկար Գերագույն խորհրդի նախագահ ընտրելու ժամանակ։ Փաստորեն, այս Հռչակագիրը մեր՝ ՀՀՇ-ի, նախընտրական ծրագիրն էր։ Սա եզակի թուղթ չի, բոլոր հանրապետությունների պառլամենտներն էլ ընդունել էին նման փաստաթուղթ։ Առաջինը նման փաստաթուղթ ընդունել էր Ռուսաստանը դեռ հունիսին։ Սակայն մեր մոտ խոչընդոտներն ավելի շատ էին, օրինակ՝ երբ մենք ընդունեցինք Հռչակագիրը, ՀԱԲ-ը մյուս օրն ակտիվացավ, և մենք ունեցանք երկու զոհ, որից հետո ստիպված էինք զինաթափել ՀԱԲ-ին։ Պարզ էր, թե ՀԱԲ-ն իրենից ինչ էր ներկայացնում»։
Մանրամասները՝ տեսանյութում։
