Հյուսիսային Կարոլինայից մի ընտանիք 20 տարվա մեջ երրորդ անգամ լոտոյով խոշոր գումար է շահում: Ինչպես հայտնում է Associated Press գործակալությունը, Մակկոլի ընտանիքի վերջին շահած գումարը 100 հազար դոլար է: Այդ գումարը նրանք շահել են 10X the Money վիճակահանությամբ մի քանի շաբաթ առաջ:
Ինչպես պատմել է շահող Քիմբերլի Մակկոլին, թեև ինքը շահում է երրորդ անգամ, այնուամենայնիվ, զարմացած է և ուրախացած: Միևնույն ժամանակ, նա իրեն հաջողակ չի համարում և չէր էլ կարծում, թե կարող է վիճակահանության հաղթող դառնալ:
Մակկոլի ընտանիքի նախորդ շահումը եղել է 161,172 դոլար: Քիմբերլիի մայրը՝ Էմին, այս գումարը շահել է Carolina Cash 5 խաղարկությամբ 2007 թ.: Ավելի վաղ՝ 1991 թ., Էմին և Քիմբերլին ջեքփոթ են շահել 15,5 մլն դոլարի չափով: Բացի այդ, երկու անգամ էլ շահել են հազարական դոլար 2009 թ.:
Քիմբերլին իր հաջողակ լինելը պայմանավորում է մորով: Նրա կարծիքով՝ Էմին իր վրա է քաշում խաղարկությունների հաջողությունը: Իսկ արդյոք շարունակելո՞ւ է Մակկոլիների ընտանիքը մասնակցել խաղարկություններին՝ չի հայտնվում:
