Ռուսաստանի իշխանությունները և հանրապետականների քաղաքական խորհրդական Փոլ Մանաֆորթը, ինչպես նաև WikiLeaks կայքը, փորձել են ազդել 2016 թվականի ԱՄՆ նախագահական ընտրությունների արդյունքների վրա՝ օգնելով գործող նախագահ Դոնալդ Թրամփին հաղթել քարոզարշավում: Նման եզրակացություն կա ԱՄՆ սենատի հանձնաժողովի զեկույցում, որը հրապարակվել է օգոստոսի 18-ին:
WikiLeaks կայքն առանցքային դեր է ունեցել Ռուսաստանի քաղաքական գործիչների գործողություններում, որոնք հետաքրքրված էին Թրամփի հաղթանակով դեմոկրատ թեկնածու Հիլարի Քլինթոնի նկատմամբ, նշում է Reuters-ը:
Զեկույցի հեղինակները նշում են, որ ՌԴ նախագահ Վլադիմիր Պուտինն անձամբ է ուղղորդել Դեմոկրատական կուսակցության հետ կապ ունեցող համակարգչային ցանցերի և օգտահաշիվների վրա իրականացված հարձակումները, ինչպես նաև արտահոսքի կազմակերպումը, որը պետք է վնասեր Հիլարի Քլինթոնին:
Սենատի հետախուզության գծով հանձնաժողովի անդամները եկել են այն եզրակացության, որ Մանաֆորթը, համագործակցելով Ռուսաստանի ներկայացուցիչների հետ, նախագահական ընտրություններից առաջ, դրա ընթացքում և դրանից հետո հանդիպումներ է ունեցել, մասնավորապես, օլիգարխ Օլեգ Դերիպասկայի և ՌԴ հատուկ ծառայությունների գործակալ Կոնստանտին Կիլիմնիկի հետ:
Զեկույցի հեղինակները պարզել են, որ Մանաֆորթի և Թրամփի մոտ լինելը բարենպաստ հնարավորություններ է ստեղծել ռուսական հետախուզության համար: Զեկույցում նաև շեշտվում է, որ Մանաֆորթի՝ գաղտի տեղեկատվությանը բարձր մակարդակի հասանելիություն ունենալը և ՌԴ հետախուզության հետ կապված անձանց հետ այդ տեղեկատվությունը կիսելու նրա պատրաստակամությունը «մեծ սպառնալիք են ներկայացրել հակահետախուզության շահերի տեսանկյունից»:
