Մինսկում իրավապահները Բելառուսի մայրաքաղաքում տեղի ունեցած բողոքի ցույցերի ընթացքում զոհված երիտասարդի հորը թույլ չեն տվել մոտենալ որդու դիակին։ Տղամարդուն հայտնել են, որ որդուն կարող է հրաժեշտ տալ միայն հուղարկավորության ժամանակ։
RBK- ի փոխանցմամբ՝ Վալերի Տարայկովսկին իր որդու՝ Ալեքսանդրի մահվան մասին իմացել է քննիչից: Ըստ ոստիկանության վարկածի, երիտասարդը փորձել է ինքնաշեն պայթուցիկ սարք նետել անվտանգության ուժերի ուղղությամբ: Սակայն հանգուցյալի հայրը հավաստիացնում է, որ կան տեսանյութեր, որոնք վկայում են այն մասին, որ որդին ձեռքին ոչինչ չի ունեցել, երբ կրակել են:
Նրա խոսքերով, իր որդին կապված չի եղել քաղաքականության հետ, այլ զբաղվել է իր սեփական գործով․ մեքենաների համար վարագույրներ է պատրաստել:
Համացանցում տեսանյութ է տարածվել, որում երևում է Ալեքսանդր Տարայովսկու մահվան պահը: Տղամարդը սպիտակ շապիկով կանգնած է ճանապարհին և ինչ-որ պահի ընկնում է, դեպի նրան է վազում ամբոխը։
Բելառուսի ոստիկանությունը հայտարարել է, որ Ալեքսանդրը փորձել է պայթուցիկ սարք նետել հատուկ ջոկատայինների ուղղությամբ, բայց այն պայթել է նրա ձեռքերում: Միևնույն ժամանակ, տղամարդու մահվան վկայականում ասվում է, որ նա կրծքավանդակի բաց վերք է ստացել և մահացել է արյունահոսությունից:
