Այն բանից հետո, երբ մեղադրող դատախազը դատարանում միջնորդեց «Սասնա ծռերի» անդամներին դատապարտել 9-ից մինչև ցմահ ազատազրկման, համացանցում Ծռերի անդամներն ու նրանց համախոհներն իրական արշավ սկսեցին վարչապետ Փաշինյանի դեմ։ Նրանց կարծիքով՝ անձամբ Նիկոլ Փաշինյանի ցանկությունն է, որ իրենք ազատազրկվեն, և եթե վարչապետը ցանկանար, ապա նրանց դեմ հարուցված քրեական գործը պետք է կարճվեր, ոմանց կարծիքով էլ՝ վերջիններս նաև պետք է հերոսացվեին։
Մի քանի ամիս առաջ «Սասնա ծռերը» հայտարարեցին, որ ավարտվում է իշխանություններին աջակցելու փուլը, և իրենք տեղավորվում են արդեն ընդդիմության դաշտում։ Կասկածից վեր է, որ եթե դատավորը բավարարի դատախազի միջնորդությունը, ու վերջիններս հայտնվեն կալանքի տակ, դրսում գտնվող նրանց համախոհները կդառնան այս իշխանություններին ամենառադիկալ ընդդիմությունը։
Քաղտեխնոլոգ Արմեն Բադալյանն արձանագրում է՝ «Սասնա ծռերի» գործողությունները տևել են մի քանի օր, դատավարությունը՝ շուրջ 4 տարի: «Կարելի է պատկերացնել, թե ինչքան երկար կտևի սահմանադրական կարգի տապալման գործով դատավարությունը»,- «Առաջին լրատվական»-ի հետ զրույցում ասաց նա։
Ըստ Բադալյանի՝ բնական է, որ «Սասնա ծռերը» համաձայն չեն այդքան տարի բանտում անցկացնել, բայց նաև պետք չէ մոռանալ, որ վերջիններս հանցագործություն են կատարել. «Նրանք գրավել են պետական շենք, նրանց գործողությունների արդյունքում երեք ոստիկան է մահացել։ Եթե երկուսի մասով կան կասկածներ, թե ինչ հանգամանքներում են մահացել, ապա մեկը հաստատ նրանց կրակոցից է մահացել։ Բնականաբար, դատախազությունը չէր կարող մեղմ պատիժ ցանկանալ նրանց համար, որքան էլ դա իրենց անդրկուլիսյան ղեկավարներին ցանկալի չլիներ։ Իրենք ասում են՝ դա ապստամբություն էր, բայց ես ժամանակին նշել եմ, որ դա դրսից ղեկավարվող պրոյեկտ էր, որը մեսիջ էր ուղղում երրորդ նախագահին։ Իրենց օգտագործել են՝ որոշակի մեսիջներ հղելու երրորդ նախագահին, միաժամանակ նաև որոշակի հարցեր պարզելու, թե ոստիկաններն ինչ մեթոդներով են պայքարում դրա դեմ։ Բնականաբար, դատախազությունը սա չի դիտարկում որպես քաղաքական պրոյեկտ, համարում է սա ահաբեկչություն ու համապատասխան պատժաչափ է ուզում»։
Մեր զրուցակցի խոսքով՝ բնականաբար, «Սասնա ծռերը» կոշտ են արձագանքելու, դիտելու են հեղափոխության արժեքների դավաճանություն. «Բայց կարող ենք արձանագրել, որ իրենք հաջողություն չեն ունենա հռչակված կոշտ ընդդիմության պայքարում։ Նրանք անգամ չեն ունենա այն հաջողությունը, որ ունեցան 2018 թվականի արտահերթ խորհրդարանական ընտրությունների ժամանակ։ Հասկանալի է, որ իրենց նկատմամբ վերաբերմունքը հասարակության մեջ փոխվել է։ Հեղափոխական էյֆորիայի ժամանակ նրանք ևս ընկալվում էին որպես նախկին իշխանությունների դեմ պայքարող ուժ, որոշակի հայդատականություն քարոզող ուժ, բայց այժմ այդ գործոնները չկան։ Ըստ իս՝ բացի իրենց կողմնակիցներից, այլ աջակցություն չունեն ու, որպես քաղաքական կառույց, չեն կարող ակումուլացնել բավականին մեծ զանգված ու դա դուրս բերել իշխանությունների դեմ։
Ուրիշ բան, որ նրանց թիկունքին կանգնած ուժին դուր չի գալիս իշխանությունների վերաբերմունքն այս դատավարության նկատմամբ, բայց դա ուրիշ հարց է։ Գուցե փորձ արվի ճնշումներ գործադրել իշխանությունների վրա, որպեսզի մեղմացվի նրանց պատժաչափը, բայց իրենք որպես քաղաքական ուժ այլևս ինքնուրույն չեն, չեն կարող որևէ գործընթաց ծավալել։ Տարբեր առիթներով նրանք կարող են օգտագործվել՝ այլ խնդիրներ լուծելու համար, բայց կարող է և չօգտագործվեն։ Առայժմ լուրջ հակաիշխանական արձագանքներ Արևմուտքից՝ հաջակցություն «Սասնա ծռերի», չկան»։
Գերագույն խորհրդի պատգամավոր Վիգեն Խաչատրյանի կարծիքով՝ խնդիրը պետք է դիտարկել միայն իրավական հարթության մեջ: «Ես ներքին համոզմունք ունեմ, որ իշխանությունները իրենց խոստմանը հավատարիմ են, դատավճիռների կայացմանը չեն մասնակցում, ուստի այս հարցում էլ, իմ կարծիքով, որևէ մասնակցություն չունեն»,- «Առաջին լրատվական»-ի հետ զրույցում ասաց նա։
Միաժամանակ մեր զրուցակիցը չբացառեց, որ «Սասնա ծռերի» անդամների կալանավորման դեպքում հնարավոր լինեն քաղաքական զարգացումներ: «Կարծում եմ՝ որոշակի լարվածություն կառաջանա, բայց ոչ ավելին»,- եզրափակեց մեր զրուցակիցը։