Վարչապետ Նիկոլ Փաշինյանի մոտ նախօրեին տեղի է ունեցել խորհրդակցություն, որի ընթացքում քննարկվել է Երևանի Ֆիրդուսի 33-րդ թաղամասի կառուցապատման նախագիծը, որը գտնվում է դեռևս մշակման փուլում:
Զեկուցվել է, որ կառուցապատման ընդհանուր տարածքը կազմում է 58 հազար քմ, իրացվել է 49 հազար քմ, 9 հազար քմ տարածքը գտնվում է իրացման փուլում: Արդեն իսկ փոխհատուցվել է 378 ընտանիքի, ընթացքի մեջ է 50 ընտանիքի փոխհատուցման գործընթացը:
Նշվել է, որ թաղամասի կառուցապատման նախագծերի վրա աշխատում է 7 ճարտարապետական խումբ՝ 60 ճարտարապետներով: Փոխհատուցման ծավալը կազմում է 60 մլն դոլար, իսկ ընդհանուր թաղամասի կառուցապատման ներդրումային արժեքը գնահատվում է 300 մլն դոլար: Ակնկալվում է, որ շինարարական աշխատանքների ընթացքում ստեղծվելու է 8-10 հազար նոր աշխատատեղ:
Պատասխանատուները վստահեցրել են, որ մեծ ուշադրություն է դարձվելու հուշարձան շենքերի պահպանությանը: Թաղամասում կառուցվելու են նաև ստորգետնյա ավտոկայանատեղիներ:
Այնուհետև ծավալվել է մտքերի շահագրգիռ փոխանակություն, որի ընթացքում կառուցապատման հետ կապված ներկայացվել են տարբեր դիտարկումներ և առաջարկություններ: Վարչապետ Փաշինյանն ընդգծել է հուշարձան շենքերի պահպանության ուղղությամբ հետևողական աշխատանքների կարևորությունը և շեշտել նախապես մշակված չափորոշիչները մինչ նախագծի ավարտը պահպանելու անհրաժեշտությունը:
Ի դեպ նշենք, որ Երևանի ժառանգության պաշտպանության կոմիտեն քաղաքային միջավայրի վերակենդանացման հայեցակարգային այլընտրանքային առաջարկների միջազգային մրցույթ էր հայտարարել, որի վերջնաժամկետը սեպտեմբերի 10-ն է։
«Առաջին լրատվական»-ի հետ զրույցում Ֆիրդուսի պաշտպանության նախաձեռնող խմբի անդամ, Երևանի ժառանգության պաշտպանության կոմիտեի անդամ Լիլիթ Գիժլարյանը նախ խոսեց մրցույթի մասին և նշեց, որ նախաձեռնության անդամները հիմա ակտիվ կերպով զբաղվում են կազմակերպչական հարցերով: «Չնայած մի ամիս դեռ չկա՝ հայտարարել ենք մրցույթի մասին, մրցույթի http://alt33.info/ կայքն արդեն ունի 4000-ից ավելի այցելու, մրցութային փաթեթը ներբեռնել են 86 երկրից մասնագետներ՝ Միացյալ Նահանգներից, Իսպանիայից, Միացյալ Թագավորությունից, Գերմանիայից, Լեհաստանից, Ռուսաստանից, Հնդկաստանից, Չինաստանից, իհարկե Հայաստանից և այլն: Մրցույթի թեմայով հոդվածներ ու հարցազրույցներ են գրել տասնյակից ավելի ճարտարապետական միջազգային կայքեր, ինչպես՝ ArchDaily, Architect’s journal, World architecture, Architectural Record և այլն:
Հուսով ենք՝ հետաքրքիր լուծումներով, ստեղծագործ, տարածքին համահունչ նախագծեր կստանանք մինչև վերջնաժամկետը: Ունենք Հայաստանից և արտասահմանից հրավիրված փորձառու ժյուրի, որն էլ կընտրի լավագույն նախագծերը: Մրցույթի մասին նաև նամակով տեղեկացրել ենք վարչապետին և Երևանի քաղաքապետին: Լավագույն առաջարկներն անպայման կուղարկենք նրանց»,- տեղեկացրեց Լիլիթ Գիժլարյանը։
Գալով վարչապետի մոտ Ֆիրդուսի 33-րդ թաղամասի կառուցապատման նախագծի քննարկմանը, Ֆիրդուսի պաշտպանության նախաձեռնող խումբն ունի հետևյալ դիրքորոշումը․ «Քննարկման ժամանակ անդրադարձել չի եղել մի շարք հարցերի, որոնք բազմիցս բարձրաձայնել են թե՛ մտահոգ քաղաքացիները և թե՛ Ֆիրդուսի բնակիչները:
Հանրությանը փաստացի ապացույց չի ներկայացվել՝ ինչպե՞ս են հաշվարկել 300 մլն ներդրումային արժեքը, ե՞րբ, ի՞նչ մեխանիզմներով է ընտրվել 60 հոգանոց ճարտարապետների խումբը, որո՞նք են հուշարձան շենքերը, որ անհրաժեշտ է պահպանել, և, ի վերջո, անցյալում կոռուպցիոն սխեմաների մեջ ներքաշված ընկերությունները ինչո՞ւ են շարունակում տարածքի կառուցապատումը»։
Մեր զրուցակցի խոսքերով՝ Ֆիրդուսի պաշտպանության նախաձեռնող խումբը, այնուամենայնիվ, մրցույթի հաղթող նախագծերը կուղարկի վարչապետի գրասենյակ և քաղաքապետարան՝ այն հույսով, որ Նարեկ Սարգսյանի կողմից առաջարկված երկնաքերային նախագիծը իրականություն չի դառնա՝ խաթարելով քաղաքի կենտրոնի պատմական, մշակութային, ճարտարապետական ներդաշնակությունը:
Ֆիրդուսի պաշտպանության համար պայքարող խմբի անդամների համար պարզ չէ, թե ինչ նախագիծ է քննարկվում վարչապետի մոտ։ «Խնդիրն այն է, որ որևէ նախագծի հղում չկա` ի՞նչ նախագիծ են քննարկել։ Գուցե ես չե՞մ նկատել։
Այսինքն՝ ենթադրում ենք, որ քննարկված նախագիծը վերջերս Վարագ Սիսեռյանի ֆեյսբուքյան էջում շրջանառվող անիմացիան էր և նախկինում շրջանառված, Նարեկ Սարգսյանի կողմից նախագծված լվացքի մեքենա հատվածը` կլոր շենքերը սալիկապատված հրապարակով, եթե դա է, այո, չի գոհացնում իհարկե, որովհետև անհասկանալի նախագծեր են, անհասկանալի մարդկանց կողմից նախագծված ու իրացվող»,- նշեցին նախաձեռնող խմբի անդամները։