Արցախը Լիբանանի ու լիբանանահայության կողքին է դժվարին իրավիճակում։ Երեկ #Արցախի_ժողովրդից_Լիբանանին անվանումով հատուկ չվերթով հումանիտար օգնություն տանող ինքնաթիռը վայրէջք կատարեց Բեյրութում։ Աջակցությունը պարենամթերքի տեսքով էր, նախաձեռնության հեղինակը՝ Արցախի կառավարությունը: Այս ծանր փորձությունը հաղթահարելու ճանապարհին Արցախը Լիբանանի հետ է՝ նշում է Արցախի նախագահ Արայիկ Հարությունյանը։
Նախագահը օրեր առաջ հայտարարել է, որ պատրաստ են լիբանանահայ 100-150 ընտանիք ընդունելու Արցախում։ Այսօր Արցախն այդ հնարավորությունն ունի՝ հայտարարել է նախագահը։ Հարությունյանը նաև նշել է, որ լիբանանահայությանն օգնելու ու աջակցություն ցուցաբերելու նպատակով խորհրդակցությունները, քննարկումները շարունակվում են։
Արցախի նախագահի արտաքին հարաբերությունների գծով խորհրդական Դավիթ Բաբայանը «Առաջին լրատվական»-ի հետ զրույցում ասաց՝ այս փուլում շատ կարևոր է ինչ-որ ձևով մարդասիրական օգնությունը տեղ հասցնել։ «Շատ կարևոր է, որ մեր պարկեշտ ներդրումն ունենանք այդ գործընթացում։ Մեր հայրենակիցները իրոք շատ են տուժել։ Լիբանանը հայտնվել է շատ ծանր իրավիճակում։ Հետևաբար այս պահին շեշտը դրվում է նրանց մարդասիրական օգնություն ցուցաբերելու վրա։ Դա նաև բարոյական օգնություն է, քանի որ մեր հայրենակիցները քաջալերվում են, գոտեպնդվում։ Իրենք չեն զգում իրենց լքված, ընդհակառակը՝ զգում են, որ ամբողջ հայությունը, Հայաստանը, Արցախը իրենց կողքին են, իրենց հոգսերը պահում են ուշադրության կենտրոնում»,- ասաց Դավիթ Բաբայանը։
Խոսելով հայրենադարձության մասին՝ Բաբայանը նշեց, որ Արցախի համար այն շատ կարևոր է և առաջին հերթին լուծելու է ժողովրդագրական խնդիրները։ «Երկրորդ հերթին մեր հայրենադարձները իրենց ուրույն ներդրումը կունենան Արցախի սոցիալ-տնտեսական զարգացման գործում։ Լիբանանահայությունը, սիրիահայությունը, ովքեր քիչ թվով, բայց արդեն իսկ եկել են Արցախ, իրավիճակ են փոխել։ Գյուղատնտեսական տարբեր կուլտուրաներ են աճեցվում, որոնք Արցախում նախկինում չեն եղել։ Նոր որակ են հաղորդել։ Սա շատ լավ է։ Հայրենադարձությունը թույլ կտա զարգացնել երկիրը տարբեր ոլորտներում, ինչու չէ՝ նաև արաբագիտությունը կարող է զարգանալ։ Ոչ միայն տնտեսական ոլորտը, այլև գիտական, կրթական, մշակութային ոլորտները մենք հնարավորություն կունենանք զարգացնելու։ Մենք պետք է լավ պատրաստվենք»,- ընդգծեց Դավիթ Բաբայանը։
Նրա խոսքով՝ հայրենադարձության ծրագրերը պահանջում են ժամանակ, ներդրում, մանրակրկիտ ուսումնասիրություն։ Չպետք է այնպես լինի, որ մարդիկ գան Արցախ ու հայտնվեն մի իրավիճակում, որտեղ կենցաղային պայմանները բարդ են, դժվար են՝ ասում է Բաբայանը. «Նման բան չպետք է թույլ տանք։ Սա այն գործընթացն է, որը մենք պետք է իրականացնենք շատ համառորեն, ճիշտ ձևով։ Հանկարծ չստացվի այնպես, որ մարդիկ գան ու տեսնեն, որ այլ իրավիճակ է։ Պետությունը, կառավարությունը կմշակի ծրագրեր։ Բայց պետք է հասկանանք, որ ժամանակ է պահանջում։ Մինչև իրենք գան, տեղավորվեն, աշխատանքի հարց լուծվի, այդ ամեն ինչը պետք է պատրաստ լինի։ Լավ մշակված ծրագիր պետք է լինի»։