Նոր չափորոշիչների շուրջ աղմուկը չի դադարում՝ տարբեր քննադատություններ են հնչում։
Ի վերջո, դրանք քաղաքական շահարկումնե՞ր են, թե՞ նոր չափորոշիչներում ինչ-որ թերություններ կան․ «Առաջին լրատվական»-ի հարցին պատմաբան Դավիթ Թինոյանը պատասխանեց․ «Ցանկացած նման մեծածավալ գործ, բնականաբար, ունենում է թերություններ։ Մենք՝ աշխատանքային խմբով, որտեղ ներառված են 11 անդամներ, երբևիցե չենք հավակնել, որ մեր աշխատանքը կարող է անթերի լինել, և ոչ մի խումբ չի կարող նման կարծիք ունենալ։ Նախ ասեմ, որ դա դեռ նախագիծ է, և դրվել է հանրային քննարկման, սակայն այս չափորոշիչների թնջուկը մեծամասամբ արհեստական ձևավորվեց։ Այն առաջին հերթին ունի քաղաքական ուղղվածություն, չնայած որ ունի նաև որոշակի գիտական ուղղվածություն, բայց այս դեպքում, ես կարծում եմ, որ քաղաքականը գերակշռող է։ Ինչպես նաև կյանքը ցույց տվեց՝ այստեղ կար նաև անձնային գործոն»։
Քննադատողները նաև ասում են, որ այս ընթացքում իրենց հետ հանդիպում չի եղել, իրենց բարձրաձայնած խնդիրներին դուք չեք լսում, չեք արձագանքում, արդյո՞ք այդպես է․ «Առաջին լրատվական»-ի հարցին Դավիթ Թինոյանը պատասխանեց․ «Նախօրոք կար պայմանավորվածություն, որ նախագիծը կդրվի քննարկման։ Նախագիծը հանրային քննարկման է դրվել հուլիսի 15-ին, որից մի քանի օր հետո սկսվեց այսպիսի տեղեկատվական գրոհ, և քննարկումների դաշտ տեղափոխելը ձախողվեց»։
Չափորոշիչներից բողոքողները իսկապես տեղյա՞կ են այդ չափորոշիչներից, նրանց քննադատություններն արդարացի՞ են, թե՞ ոչ․ «Առաջին լրատվական»-ի հարցին պատմաբան Զոհրաբ Գևորգյանը պատասխանեց․ «Ես երկար ժամանակ գիտական ոլորտում եմ աշխատել, սակայն այսօր ես կներկայանամ որպես ուսուցիչ և կխոսեմ ուսուցչի դիրքերից։ Եթե հետադարձ հայացք գցեմ անցած 2-3 շաբաթվա քննարկումներին, ապա, որպես ուսուցիչ, ուզում եմ հասկանալ՝ այս ամբողջից ես ի՞նչ օգուտ ունեմ։
Ես տեսնում եմ, որ ոչինչ, այսինքն՝ բովանդակային քննարկման շահ չեմ տեսնում։ Մանկավարժությունը շատ լուրջ երևույթ է, և սա պետք է քննարկել իր կիրառական մասով։ Ես գտնում եմ, որ պետք է կազմակերպվեր ամառային դպրոց, որտեղ ուսուցիչները պետք է փորձարկեին չափորոշիչների նպատակները, վերջնարդյունքները, դրանց հիման վրա կառուցված առաջադրանքները։ Դրա փոխարեն ես տեսնում եմ ժամանակի վատնում, և նոր չափորոշիչները չեն անցնում կիրառական, փորձագիտական ընթացք»։
Մանրամասները՝ տեսանյութում։
