Ուսումնական տարին մոտենում է և առաջնահերթ ուշադրություն է դարձվել հանրակրթության և բարձրագույն կրթության ոլորտների վրա։ Արդեն ունենք մշակված մոդելներ, թե ինչպես ենք վերաբացում հանրակրթական օջախները, ինչպես նաև բարձրագույն ուսումնական հաստատությունները։ Այս մասին ճեպազրույցի ժամանակ ասաց ՀՀ փոխվարչապետ, պարետ Տիգրան Ավինյանը։
Նա նշեց, որ այսօր տեղի է ունեցել առաջին քննարկումը և մինչև օգոստոսի 10-ը վերջնական ծրագիրը կներկայացնեն. «Նմանատիպ ծրագրային մոդելներ մշակվել են նաև այլ մոդելների համար։ Չնայած որոշում է կայացվել արտակարգ դրության ռեժիմը ևս մեկ ամսով երկարաձգել, նաև էական փոփոխություններ են լինելու արտակարգ դրության ռեժիմում սահմանված որոշակի արգելքների հետ կապված։ Մասնավորապես վերանայվելու է օտարերկրյա քաղաքացիների մուտքի հնարավորությունների հարցը, վերանայվելու են ապրանքների արտահանման որոշակի սահմանափակումներ, վերանայվելու են հանրահավաքներ անցկացնելու հարցերը, հանրային միջոցառման հարցերը»,-ասաց Տիգրան Ավինյանը՝ հավելելով, որ սա կլինի արտակարգ դրության ռեժիմի վերջին երկարաձգումը, որից հետո ԱԺ-ում կքննարկեն արտակարգ իրավիճակներով պայմանավորված օրենքներում փոփոխությունների իրականացման հարցը։
