Բեյրութի նավահանգստում տեղի ունեցած հզոր պայթյունների պատճառ է դարձել պահեստում պահվող մաքսային ծառայության կողմից առգրավված 2.750 տոննա ամոնիումի նիտրատը, ասել է Լիբանանի նախագահ Միշել Աունը: Լիբանանի ՆԳ նախարար Ռայա ալ-Հասանը «Ալ-Ջադիդ» հեռուստաալիքի եթերում նույնպես հայտարարել է սելիտրայի պայթյունի մասին՝ հավելելով, որ այդ բեռը նավահանգստի պահեստում պահվում էր 2014թ.-ից ի վեր:
Համաձայն լիբանանյան LBCI հեռուստաալիքի, Լիբանանի պաշտպանության գերագույն խորհրդի նիստում ընդունված որոշմամբ, ամոնիումի նիտրատն առգրավվել է Rhosus նավից: Մոլդովայի դրոշի տակ նավարկող նավը տեխնիկական խնդիրների պատճառով մտել է Բեյրութի նավահանգիստ 2013թ.-ի սեպտեմբերին: Rhosus-ը սելիտրան Վրաստանից տեղափոխում էր Մոզամբիկ: Ավելի ուշ բեռը բռնագրավվել է մաքսային ծառայության կողմից և պահվել է նավահանգստի պահեստում:
Նավահանգստի կառավարիչի խոսքով, ոչ ոք մուտք չի ունեցել պահեստ: Վերջերս կատարված ստուգմամբ պարզվել է, որ պահեստ կարելի է մուտք գործել պատի վրա եղած անցքով և անհրաժեշտ է փոխել դռան կողպեքը: Պայթյունը տեղի է ունեցել դռան նորոգման ընթացքում եռակցման աշխատանքների ժամանակ:
Լիբանանի մայրաքաղաքում տեղի ունեցած պայթյունի հետևանքով զոհվել է առնվազն 78 մարդ, վիրավորների թիվը հասել է 4000-ի, հայտնում է Al Hadath-ը՝ Լիբանանի առողջապահության նախարար Համադ Հասանին հղումով:
