Մեքսիկական բանակի 33 զինվորական անցել են ԱՄՆ-ի սահմանը և հայտնվել Տեխաս նահանգում: Այս մասին հայտնում է Reuters գործակալությունը: Մեքսիկացի զինվորականները 4 Humvee-ներով իրականացնում էին պարեկային ծառայություն սահմանի իրենց հատվածում՝ Ռիո-Գրանդե գետի մոտ՝ Տաումաուլիպաս նահանգում: Մի պահ նրանք անցել են կամրջով, որը կապում է Մեքսիկան ԱՄՆ-ին: Դրանով նրանք խախտել են սահմանը:
Ամերիկյան կողմում նրանց դիմավորել են իրենց գործընկերները: Նրանք պահանջել են, որ մեքսիկացիները հետևեն իրենց։ Վերջիններս էլ ենթարկվել են: Սովորական ստուգումից հետո նրանց ուղեկցել են իրենց երկիր: ԱՄՆ սահմանապահ ծառայությունում նշել են, որ ամեն ինչ եղել է խաղաղ պայմաններում: Տեղեկություններ չկան, թե արդյոք մեքսիկացիները զինված են եղել:
Ավելի ուշ Մեքսիկայի պաշտպանական կառույցը հայտարարել է, որ դա տեղի է ունեցել ոչ դիտավորյալ: Նույն բանն է ասել նաև ամերիկյան կողմը, և միջադեպը համարվել է հարթված: Մեքսիկական կողմից ԱՄՆ-ի սահմանը հսկում է մեծաքանակ զորամիավորում, քանի որ ակտիվացել են սահմանով ԱՄՆ թմրադեղեր փոխադրող մեքսիկացիները։
