Երեկ վարչապետ Նիկոլ Փաշինյանը հանդիպել է գործարարների հետ, իսկ այսօր մեկնարկել է 19-րդ հակաճգնաժամային միջոցառման հայտերի ընդունումը: Այս միջոցառման շահառուները զրոյից բիզնես ստեղծող ձեռներեցներ են: Այսպիսով՝ ինչ տեղաշարժ կա տնտեսությունում համաճարակի այս փուլում: Թեմայի շուրջ «Առաջին լրատվական»-ի հետ քննարկմանը մասնակցեցին Գործարարների և արդյունաբերողների միության փոխնախագահներ Ներսես Կարամանուկյանը, «Անտարես» հրատարակչության տնօորեն Արեմեն Մարտիրոսյանը և Գործարարների և արդյունաբերողների միության խորհրդի անդամ Արմեն Տեր-Տաճատյանը:
Վարչապետի հետ հանդիպման առանցքային հարցերից էր՝ ինչպես դուրս գալ այս իրավիճակից և ինչպես առողջացնել Հայաստանի տնտեսությունը,- նշեց Ներսես Կարամանուկյանը՝ հավելելով, որ օնլայն տեսակապով հաճախ քննարկվել են այն քայլերը, որ կառավարությունը կարող է անել իրավիճակը բարելավելու համար և մեր առաջարկները, տեսլականները ներկայացրել ենք կառավարությանը:
«Ամբողջ աշխարհում տնտեսությունը կանգ էր առել: Մեր տնտեսության վիճակը լավ չէ, բայց վատ էլ չէ»,- նշեց Արմեն Տեր-Տաճատյանը՝ հավելելով, որ դրական դինամիկա է նկատվում: Նրա խոսքով՝ բանկերում վարկային հայտերի ակտիվություն է, ճանապարհներին մարդկային շարժ կա. կորոնավիրուսով պայմանավորված՝ տնտեսության վիճակն այնքան էլ վատ չէ:
Արմեն Մարտիրոսյանի դիտարկմամբ՝ ամբողջ աշխարհում տնտեսական անկում է. պետք է կարողանանք կորոնավիրուսի ճգնաժամից դասեր քաղել: «Կորոնավիրուսը ցույց տվեց մեր բոլոր ժանգոտ տեղերը, պետք է դրանք մաքրելով, նորոգելով՝ առաջ գնանք: Այս իրավիճակը դառը, բայց լավ խորհրդատվություն էր մեզ համար: Պետք է կարողանանք այս ճգնաժամից օգտվել և թռիչք ապահովել»,- նշեց Արմեն Մարտիրոսյանը:
Քննարկման մասնակիցների դիտարկմամբ՝ համաճարակով պայմանավորաված ճգնաժամը խնդիրներ է առաջացրել և՛ երկրի ներսում, և՛ դրսում, դրա մասին է վկայում նաև արտահանման ծավալների նվազումը, աշխարհով մեկ սպառումը նվազել է: Մեր ամենախոցելի տեղը տուրիզմն է:
Մանրամասն՝ տեսանյութում:
