Անցած գիշեր հարաբերական անդորրը պահպանվել է Տավուշի սահմանային ճակատում, թեև հարկ է նկատել, որ հրաձգային կրակոցներն ավելի լայն շերտով են տարածվել՝ ոչ միայն Տավուշի, այլ նաև Նոյեմբերյանի, Գեղարքունիքի ուղղությամբ: Խնդիրն այն է, թե կթուլանա՞ լարվածությունը սահմանին: Հակառակորդը պարտություն է կրել և մտնում է դրա հետ համակերպվելու բավականին բարդ փուլ:
Թեմայի շուրջ «Առաջին լրատվական»-ի հետ քննարկմանը մասնակցեցին վերլուծաբան Արշալույս Մղդեսյանը և ԱԺ «Իմ քալը» խմբակցության պատգամավոր Անուշ Բեղլոյանը:
Անուշ Բեղլոյանի դիտարկմամբ՝ այս քայլը ձեռնարկելով՝ Ադրբեջանը ինֆորմացիոն ծուղակի մեջ է հայտնվել, քանի որ համապատասխան վերլուծություններ չանելով՝ հետևել է արտաքին աղբյուրների վերլուծություններին, որոնք Հայաստանը ներկայացնում էին որպես խոցելի երկիր, իսկ ՀՀ իշխանությանը ժամանակավոր. «Եվ Ալիևը համոզմունք էր ձեռք բերել, որ Հայաստանը այս պահին իբրև թե ռազմական տեսակետից ավելի թույլ է: Նրանք կարծում էին, որ իրենց ռազմական հաջողությունն անխուսափելի կլինի, և այդ սխալ հաշվարկն անելու և տեղեկատվական ծուղակի մեջ ընկնելու հետևանքով Ադրբեջանը ճակատագրական սխալ արեց»:
Արշալույս Մղդեսյանի խոսքով՝ Հայ-ադրբեջանական սահմանագծի դիրքերում միշտ էլ լինում են դիրքային բարելավման գործընթացներ յուրաքանչյուր հարմար պահի, որպեսզի ունենան դոմինանտ դիրքեր: «Կարծում եմ՝ գործ ունենք նմանատիպ իրավիճակի հետ, ռազմական գործողությունները տեղի են ունենում շատ նեղ հատվածում, չեն տարածվում, ֆրոնտային հարաձակումներ չեն լինում այլ տեղերից: Ադրբեջանը միշտ խուսափել է Հայաստանի հետ առճակատումից հենց սահմանին, և ճակատը փորձել է տեղափոխել Արցախ՝ ասելով, որ դա իր տարածքն է… Ադրբեջանի հետ շահեկան չէր այդ հատվածում Հայաստանի հետ հակամարտության մեջ մտնելը, այլ բան է կրակելը, կրակելը մշտապես եղել է, ադրբեջանական տրամաբանության տեսանկյունից, եթե չկարակեն, որևէ մեկը չի հիշի այդ կոնֆլիկտի մասին»,- նշեց վերլուծաբանը:
«Ադրբեջանը խնդիր ունի արձանագրել դիվանագիտական և ռազմական հաղթանակ»,- նշեց Անուշ Բեղլոյանը:- Ղարաբաղայան հակամարտությունը այն հիմքերից է, որի վրա Ալիևի ռեժիմը կարողանում է լեգիտիմացնել տարբեր կոռուպցիոն երևույթները կլանային համակարգը և այլն: Ադրբեջանը նպատակ ուներ ևս մեկ անգամ ցուցադրել, որ կարող է ներխուժել Հայաստանի տարածք. նրանք պնդում են, որ միջազգային ճանաչված սահման չկա Ադրբեջանի և Հայաստանի միջև, և այս քայլով նաև ցանկանում են բանակցային սեղանին տարածքային պահանջներ ներկայացնել Հայաստանին»:
Արշալույս Մղդեսյանն ընդգծեց, որ Թուրքիան կարող է օգնել Ադրբեջանին, բայց լուրջ գործողությունների չի գնա՝ հաշվի առնելով Ռուսաստանի գործոնը:
Մանրամասն՝ տեսանյութում:
