Ապրիլից Ճամբարակում սկսված անասուների դաբաղ հիվանդությունը մինչ օրս շարունակվում է: «Առաջին լրատվականի» հետ զրույցում Ճամբարակի փոխքաղաքապետ Սերգեյ Ավալյանը հայտնեց, որ հունիսի սկզբից շրջանում հայտարարված կարանտինը շարունակում է գործել և արտահանումն արգելված է:
Ս. Ավալյանի խոսքով, Ճամբարակում անասունների դաբաղի դեպքերը զանգվածային չեն, բայց 3 թաղամասերում կան: Անասունների պրոֆիլակտիկ բուժում տարվում է, սակայն վարակը շարունակվում է:
«Պատվաստումները ժամանակին չեն կատարել, վիրուսն ուժեղացել է, և որոշ տեղերում կենդանիները չեն դիմանում: Եթե ժամանակին սրսկեին, այսքան վնասը չէր լինի»,- ասաց Ս. Ավալյանը՝ նշելով, որ վարակը սկսվել է Ճամբարակից վեր գտնվող Վահան գյուղից, ապա տարածվել է ներքևի ենթաշրջաններում, Մարտունու մի քանի գյուղերում, իսկ, օրինակ՝ Թթուջուր գյուղում և լճամերձ տարածքներում չկա:
Ներկայում Ճամբարակում իրականացվում են վնասի հաշվառման աշխատանքներ, արդյունքները կներկայացվեն կառավարությանը՝ փոխհատուցման ակնկալիքով:
Ս. Ավալյանը հայտնեց, որ Գյուղատնտեսության նախարարության սննդամթերքի անվտանգության պետական ծառայության նախկին ղեկավար Գրիգոր Բաղյանն էլ է այցելել շրջան ու ծանոթացել իրավիճակին:
Նշենք, որ ԳՆ Սննդամթերքի անվտանգություն պետական ծառայության հասարակայնության հետ կապերի բաժնի պետ Բաբկեն Պիպոյանը վերջերս հայտարարել էր, թե լաբորատոր հետազոտությունները ցույց են տվել, որ Գեղարքունիքի մարզի Ճամբարակ համայնքի անասունների մոտ դաբաղի դեպքեր չկան, ինչպես նաև չկան ողջ հանրապետության տարածքում: Նա չէր հերքել, որ կարանտին հայտարարվել է՝ նշելով, որ դա արվել է կանխարգելիչ նկատառումներից ելնելով, քանի որ խոսքն Ադրբեջանին սահմանակից բնակավայրի մասին է, իսկ Ադրբեջանում անասունների դաբաղի դեպքեր կան:
