Կանաչ ձախեր կուսակցությունից Հաագայի քաղաքային խորհրդի անդամ Սերպիլ Աթեշը «Թվիթեր»-ի իր պաշտոնական էջում անդրադարձել է հայ-ադրբեջանական սահմանին Ադրբեջանի սադրիչ գործողություններին:
Նա գրել է, որ Թավշյա հեղափոխությունից հետո Հայաստանը ժողովրդավարության օրրան է դառնում, իսկ Ռուսաստանը և Թուրքիան կեղտոտ խաղեր են խաղում խաղաղասեր Հայաստանի հետ։
Նա կոչ է արել դադարեցնել պատերազմը և Ադրբեջանին, Թուրքիային ու Ռուսաստանին հորդորել է բռնապետություններից վերածվել ժողովրդավարական երկրների։
«Մենք հիշում ենք Հայոց ցեղասպանությունը»,-եզրափակել է Աթեշը:
ՀՀ պաշտպանության նախարարությունը հայտնել էր, որ Ադրբեջանի զինված ուժերի զինծառայողները հուլիսի 12-ին՝ ժամը 12:30-ի սահմաններում, ՈՒԱԶ մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձ են կատարել: «Հայկական կողմի նախազգուշացումից հետո Ադրբեջանի զինծառայողները, թողնելով ՈՒԱԶ մակնիշի ավտոմեքենան, վերադարձել են իրենց դիրք: Ժամը 13:45-ին Ադրբեջանի զինված ուժերի զինծառայողները կրկնել են հայկական զինված ուժերի սահմանային դիրքը գրավելու փորձը՝ կիրառելով հրետանային կրակ, սակայն ճնշվել են հայկական կողմից և, կորուստներ կրելով, հետ շպրտվել»,-հայտնել էր ՀՀ պաշտպանության նախարարության մամուլի խոսնակ Շուշան Ստեփանյանը:
Ավելի ուշ Ադրբեջաբական կողմը վերսկսել էր հրետակոծել հայկական դիրքերը, թիրախավորել էր նաև քաղաքացիական օբյեկտները:
Հուլիսի 16-ի լույս գիշերը ժամը 03:40-ի սահմաններում ՀՀ ԶՈՒ դիրքապահները նկատել են հակառակորդի շարժ։ Անցնելով շրջանաձև պաշտպանության՝ հայկական ստորաբաժանումները կանխել են հակառակորդի դիվերսիոն ներթափանցման փորձը։ Թեժ մարտից հետո հակառակորդը, կորուստներ կրելով, հետ է շպրտվել։ Այնուհետև ադրբեջանական ստորաբաժանումները ժամը 05:20-ին սկսել են հրետակոծել Այգեպար և Մովսես գյուղերը՝ կիրառելով ականանետ և Դ-30 հաուբից: Սա հուլիսի 15-ի ժամը 00:15-ից հաստատված փխրուն հրադադարի առաջին կոպիտ խախտումն էր:
