Այսօր՝ հուլիսի 14-ին, բարեկամ Ֆրանսիան նշում է իր Ազգային տոնը՝ Բաստիլի գրավման օրը։
«Հանուն Հանրապետության» քաղաքական նախաձեռնությունը սրտանց շնորհավորում է մեր ֆրանսիացի քույրերին ու եղբայրներին Ֆրանսիայի Հանրապետության Ազգային տոնի առթիվ՝ մաղթելով զարգացում և բարգավաճում։
Հայ և ֆրանսիացի ժողովուրդները կապված են դարավոր բարեկամական, եղբայրական կապերով, որոնք իրենց արտահայտությունն են գտել նաև երկու երկրների միջև հաստատված ամուր, գործընկերային հարաբերություններում։
Նորանկախ Հայաստանի պատմության ընթացքում Ֆրանսիան միշտ եղել և շարունակում է լինել Հայաստանի կողքին։
Մենք չափազանց բարձր ենք գնահատում այն ջանքն ու աշխատանքը, որ Ֆրանսիան իրականացնում է ղարաբաղյան հակամարտության խաղաղ կարգավորման գործընթացում՝ որպես ԵԱՀԿ Մինսկի խմբի համանախագահ երկիր։
Հայ ժողովուրդն ու Հայաստանը երախտապարտ են Ֆրանսիային Հայոց ցեղասպանության ճանաչման, դատապարտման և դրա ժխտման կանխարգելմանն ուղղված ավանդի համար։
Ֆրանսիայում է գտնվում հայկական Սփյուռքի ամենամեծ գաղթօջախներից մեկը։ Մեր քույրերն ու եղբայրները մշտապես ջերմ ու հյուրընկալ վերաբերմունքի են արժանացել ֆրանսիական պետության ու հասարակության կողմից, ինչը ևս մենք չափազանց բարձր ենք գնահատում։
Ֆրանսիան Հայաստանի կողքին է նաև աշխարհին պատուհասած նոր աղետի՝ կորոնավիրուսի համավարակի օրերին։ Վերջին շաբաթների ընթացքում ֆրանսիացի բժիշկների մի քանի խմբեր ժամանեցին Հայաստան՝ օգնելու իրենց հայ գործընկերներին համավարակի դեմ պայքարի գործում։ Մենք այս օգնությունը երբեք չենք մոռանա։
Ջերմորեն շնորհավորելով Ֆրանսիայի բարեկամ ժողովրդին Ազգային տոնի առթիվ՝ այս դժվարին ժամանակներում մաղթում ենք առողջություն ու վճռականություն համավարակի դեմ պայքարելու ու այն վերջնականորեն հաղթահարելու գործում։
«Հանուն Հանրապետության» քաղաքական նախաձեռնություն
https://www.facebook.com/hanun.hanrapetutyan/photos/a.129046615459823/149166506781167/?type=3&theater
