Այսօր անդրադառնալով ՀԱԿ-ի և կոալիցիայի ձևավորած օրակարգին՝ քաղաքական և ընտրական տեխնոլոգիաների փորձագետ Արմեն Բադալյանը նշեց, որ արդեն ՀԱԿ օրակարգը ձևավորված է՝ այն, թե ինչ են ցանկանում քննարկել: Նույնը չկարողացավ ասել իշխանության մասով: Իսկ ինչ վերաբերում է իշխանությունների պատասխանին՝ դժվարացավ ասել իշխանությունները դրան կհամաձայնեն, թե չեն համաձայնի, որովհետև ՀԱԿ-ը բազմաթիվ կետեր է առաջարկել՝ Ազատության հրապարակի բացում, քաղբանտարկյալների ազատ արձակում, ինչն իշխանությունները սկզբում մերժել են, բայց հետո՝ կատարել:
«Այս հարցի պատասխանը կերևա մեկ ամսվա ընթացքում: Հիմա, ինչպես հասկացա, իշխանությունները վերցրել են բանակցություններում արձանագրային հարցեր քննարկելու տակտիկան: Այսինքն՝ ամեն հանդիպմանը ինչ-որ պրոտոկոլային հարցեր են քննարկում: Բայց կոնկրետ իր օրակարգը չի ներկայացրել: Իհարկե, իշխանությունները ասել են, թե ինչ հարցեր են պատրաստվում քննարկել արտագաղթ և այլն, և այլն: Բայց դա կոնկրետություն չի: Արտագաղթի դեմը պետք է առնել այն կետերով, ինչ ներկայացնում է ՀԱԿ-ը: ՀԱԿ-ն ասում է, որ արտագաղթի և մնացած հարցերի դեմը կարելի է առնել իր օրակարգով, իր լուծումներով: Իսկ իշխանությունը դրան կգնա, թե ոչ՝ չեմ կարող ասել:
Դա կապված է նաև, թե ՀԱԿ-ը հասարակության հետ ինչպե՞ս կաշխատի, այդ թվում՝ նաև իր ընտրազանգվածի: Ինչքանո՞վ կկարողանա իր օրակարգն ընդունելի դարձնել հասարակության մեծ մասի համար: Եթե դա հաջողվեց, ինչպես նաև հաջողվեց դրսի ուժային կենտրոնների հետ լեզու գտնել, ես այն տեսակետին եմ, որ եթե այս հարցերը համախմբվեն և համաձայնություն տրվի, ՀԱԿ-ի համար դրական արդյունք կարող է ապահովվել»:
