Առաջին անգամ Հյուսիսային կիսագնդում հայ սուզորդների թիմը ուսումնասիրեց 3207 մետր բարձրության վրա գտնվող Արագած լեռան Քարի լճի հատակը և սահմանեց համաշխարհային ռեկորդ. մինչ այս նման փորձ իրականացրել էր միայն Ժակ Իվ Կուստոյի թիմը Հարավային կիսագնդի Տիկտիկակա լճում:
Այսօր լրագրողների հետ հանդիպման ժամանակ «Այաս» ծովային հետազոտությունների ակումբի նախագահ, «Կիլիկիա» նավի նավապետ Կարեն Բալայանը, դայվինգի համաշխարհային չեմպիոն Ռաֆայել Մկրտչյանը, «Այաս» ծովային հետազոտությունների ակումբի փոխնախագահ Արման Աբգարյանը և «Հայ էքստրիմ» ՀԿ-ի ներկայացուցիչները ներկայացրին լճում կատարված աշխատանքի արդյունքները։
Տեղեկացնենք, որ սույն թվականի հուլիսի 21-ին «Այաս» ծովային հետազոտությունների ակումբը և «Հայ էքստրիմ» ՀԿ-ն դայվինգի համաշխարհային չեմպիոն Ռաֆայել Մկրտչյանի գլխավորած արշավախմբի շնորհիվ սահմանեցին համաշխարհային ռեկորդ Հյուսիսային կիսագնդում: Թիմի անդամներն էին սուզորդ Ռաֆայել Մկրտչյանը, «Այաս» ակումբի նախագահ, «Կիլիկիա»-ի նավապետ Կարեն Բալայանը, արտակարգ իրավիճակների հատուկ վարչության ջրասուզակների խմբի հրամանատար Արտակ Էլմասակյանը, «Հայ էքստրիմ» արտակարգ իրավիճակներում աշխատող բժշկական թիմը՝ Գևորգ Շահսուվարյանի ղեկավարությամբ: Ինչպես տեղեկացրեց դայվեր Ռ. Մկրտչյանը, որը չորս տարի առաջ ռեկորդ էր սահմանել Հնդկական օվկիանոսում՝ սուզվելով 108 մետր, մինչ սուզումը կանխատեսումներ անելը շատ բարդ էր՝ հաշվի առնելով լճի տեղադիրքի բարձրությունը, թթվածնի պակասությունը ցամաքում, ճնշումների կտրուկ տատանումը, սակայն մեկ ժամ քսան րոպե մնացել են Քարի լճի հատակում, ստույգ ճշտել խորությունը՝ տասներկու մետր, բնակլիմայական վիճակը, ուսումնասիրել ողջ մակերեսը և հնարավոր վտանգների առկայությունը: Կարեն Բալայանի տեղեկացմամբ՝ հետազոտությունը երկու նպատակ ուներ՝ պարզել, թե մարդու օրգանիզմը որքանով կարող է դիմակայել նման էքստրեմալ պայմաններին և նաև իրականացնել գիտական հետազոտություններ:
Նշենք, որ Քարի լիճը տարածաշրջանի ամենաբարձր հրաբխային լճերից մեկն է ՝ 400 քառ. մետր մակերեսով:
«Հայաստանը օտարերկրյա դայվերների համար անհաղթահարելի հնարավորություններ ունի, և հետաքրքիր է հետևել, թե, ինչպես է հարթավայրային աշխատանքին սովոր դայվերը Հայաստանում բախվում խոչնդոտների»,- նկատեց «Հայ էքստրիմ» ՀԿ-ի ներկայացուցիչը՝ տեղեկացնելով, որ հետազոտական խմբի մեջ ներառված էին նաև այլազգի դայվերներ:
Հանդիպման ավարտին հայ դայվերներին շնորհվեցին պատվոգրեր՝ 3207 մետր բարձրության վրա գտնվող Արագած լեռան Քարի լճի հատակն ուսումնասիրելու համար:
