ԱՄՆ պետքարտուղար Մայքլ Պոմպեոն Բելառուսում Անկախության օրվա տոնակատարության կապակցությամբ հանրապետության իշխանություններին արդար և ազատ ընտրություններ անցկացնելու կոչ է արել: ԱՄՆ ԱԳՆ ղեկավարի համապատասխան հայտարարությունը տարածվել է ուրբաթ օրը:
«Մենք կառավարությանը հորդորում ենք անել հնարավոր ամեն ինչ արդար և ազատ ընտրությունների ապահովման համար»,- ասել է ամերիկյան դիվանագիտության ղեկավարը՝ շնորհավորելով Բելառուսի բոլոր քաղաքացիներին Անկախության օրվա կապակցությամբ: Նա պարզաբանել է, որ արդար և ազատ ընտրությունների պահանջը ներառում է թեկնածուների լայն շրջանակի ընտրարշավին մասնակցելու իրավունքը, խաղաղ հավաքների իրավունքը, ինչպես նաև ձայների բաց և արդար հաշվարկը:
Պոմպեոն պարզաբանել է, որ հիմնարար ազատություններն անհրաժեշտ են երկրի անկախությունն ու ինքնիշխանությունը ապահովելու համար: Պետքարտուղարի խոսքով, Միացյալ Նահանգները ոգևորված է երկկողմ հարաբերությունների զարգացմամբ և հավատարիմ է Բելառուսի տնտեսության զարգացման և դիվերսիֆիկացիայի ուղղությամբ համագործակցությանը:
Բելառուսում նախագահական ընտրությունները նշանակված են օգոստոսի 9-ին:
