Անբուժելի հիվանդությունների բուժման դեղամիջոցներ գտնելու համար բրիտանացի գիտնականները վերջին երեք տարիների ընթացքում գաղտնի մեծացրել են 155 սաղմ, որոնք ունեցել են խառը գենետիկական նյութ՝ կենդանական և մարդկային: Այս մասին գրում է The Daily Mail-ը՝ պատմելով բրիտանացի խորհրդարանական լորդ էլթոնի հարցման արդյունքների մասին, որ ստացվել են այդ լաբորատորիաներից:
Պարզվել է, որ 2008 թ. ուժի մեջ մտած նոր օրենքի համաձայն, որը վերաբերում էր կլոնավորման և սաղմնաբանության խնդիրներին, Լոնդոնի Քինգս քոլեջին, Նյուքասլի և Յորքի համալսարարաններին տրված արտոնագրով վերջիններս իրավունք են ստացել նմանօրինակ հետազոտություններ անցկացնել:
Ըստ գիտնականների՝ այս փորձերը թույլ կտան ստանալ այնպիսի ցողունային բջիջներ, որոնք հնարավոր կլինի օգտագործել մի շարք լուրջ հիվանդություններին բուժում գտնելու հարցում: Գիտնականները նաև հայտնել են, որ այս պահին ֆինանսավորումը վատ է իրականացվում, սակայն հույս ունեն, որ ապագայում այդ հարցը կլուծվի, իսկ գիտափորձերը շատ հարցերի լուծում կտան:
Լորդ Էլթոնը դեմ է մարդու և կենդանու խառը սաղմերի ստացմանը և պահանջում է, որպեսզի այս գիտափորձերն արգելվեն, իսկ անհրաժեշտ և կարևոր դեղամիջոցների ստացման փաստարկը նա «հուզական շանտաժ է» անվանում:
