Ռուսաստանն իր հարևան երկրների նկատմամբ տարածքային պահանջներ չունի: Այս մասին երկուշաբթի լրագրողներին հայտարարել է ՌԴ նախագահի մամուլի քարտուղար Դմիտրի Պեսկովը՝ մեկնաբանելով «Մոսկվա. Կրեմլ. Պուտին» ֆիլմի համար Վլադիմիր Պուտինի տված հարցազրույցի ժամանակ հնչած մի շարք արտահայտություններ։
«Ոչ, Ռուսաստանը որևէ տարածքային պահանջ չունի հարևանների նկատմամբ»,- նշել է Պեսկովը:
Վլադիմիր Պուտինը «Մոսկվա. Կրեմլ. Պուտին» հաղորդման եթերում, որը հեռարձակվել է «Ռոսիա 1» հեռուստաալիքով, հայտարարել է, որ Խորհրդային Միության ստեղծման ժամանակ շատ հանրապետություններ, ընդգրկվելով դրա կազմում «հսկայական քանակությամբ ռուսական հողեր» և «ռուսական պատմական տարածքներ» են ստացել: Միևնույն ժամանակ, ԽՍՀՄ-ից դուրս գալիս, Ռուսաստանի նախագահի կարծիքով, այդ հանրապետություններից յուրաքանչյուրը պետք է դուրս գար «ինչով եկել էր» և ոչ թե «տաներ ռուս ժողովրդից ստացած նվերները»:
Պուտինը չի հստակեցրել, թե որ հանրապետությունների ու որ տարածքների մասին է խոսքը, նշելով, որ «Խորհրդային Միության ստեղծման ժամանակ պայմանագրով սահմանվել է դրա կազմից դուրս գալու իրավունքը, բայց չի սահմանվել ընթացակարգը»:
