Ռուսական ИНТЕРФАКС գործակալության փոխանցմամբ՝ 2011 թվականի առաջին կիսամյակին ռուս զբոսաշրջիկներին առնչվող ապահովագրական դեպքերի ու վճարված փոխհատուցման ծավալով արտասահմանյան երկրների ցանկը գլխավորել է Թուրքիան։ Այս մասին ասվում է «Ռոսնո» ապահովագրական ընկերության տարածած հաղորդագրության մեջ։
Ռուս զբոսաշրջիկները նախընտրում են հանգստանալ լողափեր ու լեռնային առողջարաններ ունեցող Թուրքիայում, Ավստրիայում, Հունաստանում, Թաիլանդում։ Հենց այդ երկրներում էլ գրանցվում են ռուս զբոսաշրջիկներին առնչվող ամենից մեծ ապահովագրական դեպքերը։
«Ռոսնո»-ի տվյալներով, այս տարվա առաջին վեց ամիսներին Թուրքիայում ռուսների հետ գրանցվել է 3110 ապահովագրական դեպք, ինչի համար վճարվել է 11.8 միլիոն ռուբլի։
Երկրորդ տեղում Բուլղարիան է՝ 692 դեպք։ Սակայն վճարած փոխհատուցման ցուցանիշով Բուլղարիան զբաղեցրել է միայն 10-րդ տեղը, ինչը պայմանավորված է տվյալ երկրում բուժման ցածր գնով և ապահովագրական դեպքերի պարզ բնույթով։
Երրորդ տեղում Հունաստանն է՝ 532 դեպք։ Փոխհատուցման ծավալով Հունաստանը դարձյալ երրորդ տեղում է՝ 5.02 միլիոն ռուբլի։
Ռուսական ընկերության տվյալներով, ապահովագրական դեպքերի ամենաբարձր ցուցանիշը գրանցվել է հունվարին (2242 դեպք, 12.2 միլիոն ռուբլի փոխհատուցում), ինչը պայմանավորված է նրանով, որ ռուս զբոսաշրջիկները նախընտրում են իրենց ամանորյա արձակուրդն անցկացնել կամ հեռավոր տաք երկրների արևոտ լողափերում, կամ էլ լեռնային առողջարաններում՝ դահուկներով հաղթահարելով ձնապատ լանջերը։
Հիշեցնենք, որ այս տարի Թուրքիայի Բոդրում հանգստավայրում Հյուսիսային Կիպրոսից բերված անորակ ալկոհոլից թունավորվել էին մի շարք ռուսներ, որոնցից մի քանիսը մահացել էին։
Смотрите оригинал материала наhttp://www.interfax.ru/tourism/tourisminf.asp?sec=1466&id=200689
