Թուրքական Cumhuriyet թերթի փոխանցմամբ՝ եթե Իսրայելը ներողություն չխնդրի «Մավի Մարմարա»-ի միջադեպի կապակցությամբ, ապա Թուրքիան մտադիր է նվազեցնել նրա հետ շփումները՝ ընդհուպ մինչև դիվանագիտական հարաբերությունների խզում։
Նշվում է, որ թուրքական կառավարությունը պատրաստել է «Բ» պլան, որն ուժի միջ կմտնի շաբաթ օրն Էրդողանի ներկայացրած վերջնագրի ժամկետի ավարտից անց։
Հիշեցնենք, որ իր վերջնագրում Էրդողանն ընդգծել էր երեք կետ. նա հայտարարել էր, որ քանի դեռ Իսրայելը պաշտոնապես ներողություն չի խնդրել Թուրքիայից, փոխհատուցում չի վճարել տուժածների հարազատներին և չի վերացրել Գազայի հատվածի շրջափակումը, թուրք-իսրայելական հարաբերությունները կմնան չկարգավորված։
ՄԱԿ-ի հանձնաժողովը «Մավի Մարմարա»-ի վերաբերյալ զեկույցը հրապարակելու է հուլիսի 27-ին։ Այն պատրաստ է հուլիս ամսվա սկզբից, բայց քանի որ դրանում հակաթուրքական և հակաիսրայելական հատվածներ կան, ուստիև կողմերը հրաժարվում են ստորագրել այն։
Իսրայելի ներողություն չխնդրելու պարագայում Էրդողանը գործի է գցելու իր «Բ» պլանը, որը կազմված է երեք բաղկացուցիչ մասերից.
ա) իրավական պայքար – Թուրքիան «Մավի Մարմարա»-ի միջադեպի ժամանակ իսրայելցի զինծառայողների գործողությունների դեմ դիմելու է միջազգային դատարան։
բ) երկկողմանի հարաբերություններ – Թուրքիան պատրաստվում է նվազեցնել Իսրայելի հետ դիվանագիտական շփումները՝ ընդհուպ մինչև հարաբերությունների խզում։ Թուրքիան կարող է չընդունել Իսրայելի նորանշանակ դեսպանին։ Հարված կհասցվի նաև թուրք-իսրայելական տնտեսական հարաբերություններին։
գ) Գազայի հատված – Եթե Իսրայելը չվերացնի Գազայի հատվածի շրջափակումը, ապա Թուրքիան պատրաստվում է միջազգային բոլոր հարթակներում քաղաքական պայքար մղել Իսրայելի դեմ։
Հիշեցնենք, որ ավելի վաղ Էրդողանը հայտարարել էր դեպի Գազայի հատված այցելելու իր ցանկության մասին, որը դեռ մնում է ուժի մեջ։ Սակայն այդ այցի հետ կապված՝ դեռևս կոնկրետ ժամկետներ չեն նշվում։