Մեծ մասամբ արաբական բնակչություն ունեցող իսրայելական քաղաքներում բողոքի ցույցեր են տեղի ունեցել, որոնք ուղեկցվել են անկարգություններով: Այս մասին հայտնում է ՌԻԱ «Նովոստին» ՝ հղում անելով Իսրայելի ոստիկանության մամուլի ծառայությանը:
Բողոքի ակցիաների պատճառը իսրայելցի ոստիկանի կողմից աուտիզմով հիվանդի սխալմամբ սպանությունն էր: Մայիսին իսրայելցի սահմանապահները սխալմամբ կրակել էին Արևելյան Երուսաղեմի՝ իրենցից փախչող մի բնակչի վրա՝ նրան զինված մարդու տեղ ընդունելով: Սպանվածը 32-ամյա Իյադ ալ-Հալաքն էր, որը տառապում էր աուտիզմով և զինված չէր:
Իսրայելում զանգվածային ցույցեր են տեղի ունեցել Երուսաղեմում, Հայֆայում և Յաֆֆայում։
Տեղի ոստիկանությունը հայտնել է, որ Յաֆֆա քաղաքում իրավապահները ստիպված են եղել միջամտել այն բանից հետո, երբ ցուցարարները սկսել են քարեր նետել ոստիկանների և նրանց մեքենաների վրա: Երուսաղեմում վեց մարդ ձերբակալվել է այն բանից հետո, երբ փորձել են արգելափակել տրամվայի գծերը:
Այս ակցիաները տեղի են ունեցել Միացյալ Նահանգներում անցկացվող բողոքի ցույցերի ֆոնին։ Հիշեցնենք, որ մայիսի 25-ին Մինեապոլիսի ոստիկանները ձերբակալել էին աֆրոամերիկացի Ջորջ Ֆլոյդին։ Ձերբակալելու պահին ոստիկանը տղամարդուն պառկեցրել է գետնին ու ծնկով սեղմել է նրա վզին։ Անտեսելով տղամարդու շնչել չկարողանալու մասին խոսքերը՝ ոստիկանը հրաժարվել է նրան բաց թողնել, ինչի հետևանքով Ֆլոյդը մահացել է: Այս ամենից հետո ԱՄՆ-ում բողոքի զանգվածային ցույցեր սկսվեցին։
