Ադրբեջանական ANS PRESS-ի փոխանցմամբ՝ երեկ երկօրյա այցով Ադրբեջան է այցելել Ռուսաստանի պաշտպանության նախարար Անատոլի Սերդյուկովը։ Վերջինս հանդիպումներ է ունենալու Ադրբեջանի նախագահ Իլհամ Ալիևի ու իր ադրբեջանցի գործընկեր Սաֆար Աբիևի հետ։
Այդ հանդիպումների ժամանակ կողմերը քննարկելու են Ռուսաստանի կողմից Ադրբեջանի տարածքում գտնվող Գաբալայի ռադիոտեղորոշիչ կայանի (ՌՏԿ) վարձակալության ժամկետի երկարաձգման հարցը։
Բացի այդ, քննարկվելու է նաև երկու երկրների զինված ուժերի զարգացման հարցը, նրանց միջև ռազմական և ռազմատեխնիկական համագործակցությունը։
Հիշեցնենք, որ «Դարյալ» տիպի Գաբալայի ՌՏԿ-ն շահագործման է հանձնվել 1985 թվականին: 2002 թվականին Ադրբեջանն այն վարձակալությամբ հանձնել է Ռուսաստանին, որը դրա դիմաց տարեկան 14 միլիոն դոլար է վճարում նրան:
Գաբալայի ՌՏԿ-ի հեռահարությունը կազմում է 6000 կիլոմետր: Այսինքն՝ նրա տեսադաշտում են գտնվում Իրանը, Թուրքիան, Հնդկաստանը, Մերձավոր Արևելքը, ինչպես նաև Հնդկական օվկիանոսն ու Ավստրալիայի մի մասը:
Գաբալայի ՌՏԿ-ի վարձակալության ժամկետն ավարտվում է 2012 թվականի օգոստոսին։ Կայանում աշխատում են 1400 ռուս զինծառայողներ։