Այն բանից հետո, երբ մամուլում տեղեկություններ հայտնվեցին, որ Ղազախստանի նախագահ Նուրսուլթան Նազարբաևը վիրահատվել է Գերմանիայում, և, ենթադրաբար, նրա մոտ քաղցկեղ է հայտնաբերվել, թե՛ Ղազախստանում և թե՛ նրա սահմաններից դուրս սկսեցին ենթադրություններ անել, թե ով կարող է փոխարինել Նազարբաևին երկրի ղեկավարի պաշտոնում: Коммерсант թերթին տված հարցազրույցում Նազարբաևի խորհրդական Երմուհամեդ Երթիսբայևը առաջին անգամ բաց տեքստով հայտարարել է, որ Նազարբաևի փեսան՝ Թիմուր Կուլիբաևը, կարող է դառնալ Նազարբաևի հավանական ժառանգորդը:
«Հենց Կուլիբաևը կարող է շարունակել նախագահի ռազմավարական ուղին, շարունակել և պահպանել պետական-քաղաքական կարգի հիմնական ուղղությունները, որոնք ներառված են 1995 թ. Սահմանադրության մեջ, որն անվանում են «նազարբաևյան»: Այս տեսակետից Թիմուր Կուլիբաևը և՛ Մուխտար Աբլյազովի, և՛ Ռահաթ Ալիևի (երկուսն էլ Նազարբաևի հակառակորդներ են, որոնք փախել են արտասահման – 1in.am) և՛ այլ՝ այսպես կոչված փախստականների համար եթե ոչ ամենամեծ վտանգն է, ապա գոնե՝ մեծ տհաճություն: Որովհետև ես Թիմուր Կուլիբաևին շատ լավ գիտեմ: Նա ավարտել է Մոսկվայի պետական համալսարանի տնտեսագիտության ֆակուլտետը, լավագույն ուսանողներից մեկն է եղել, ունի համակարգային մտածողություն և կառավարման մեծ փորձ»,- ասել է Երթիսբաևը:
Կուլիբաևը, Forbes ամսագրի տվյալներով, Ղազախստանի երրորդ ամենահարուստ մարդն է, որի կարողությունը 1.3 մլրդ դոլար է:
