Թուրքական Hürriyet թերթի փոխանցմամբ՝ Թուրքիան սկսել է կառուցել սեյսմիկ հետազոտությունների առաջին նավը, որը եռաչափ ռեժիմում հետազոտություններ կանցկացնի ծովի հատակին։ Այս նախագծին աջակցում են Թուրքիայի ռազմական արդյունաբերության նախարարությունը և վարչապետական ապարատը։ Թուրքիայի Էներգետիկայի ու բնական պաշարների նախարար Թաներ Յըլդըզը նույնպես մեծ կարևորում է այդ նավի ստեղծումը։
Նավի կառուցումը տևելու է երկու տարի, այն ի վիճակի կլինի եռաչափ նկարահանումներ անցկացնել ծովերի հատակին։ Նավն ունենալու է 90 մետր երկարություն և 18-20 մետր լայնություն։ Նավի կառուցումն արժենալու է 100 միլիոն եվրո։ Շահագործման հանձնումից հետո նավն իր գործունեությունը կծավալի Սև, Միջերկրական, Էգեյան և այլ բաց ծովերում։
Նավը կհետևի ծովերում տեղի ունեցող երկրաշարժերին։ Բացի այդ, նա Սև ծովում կիրականացնի նավթի որոնողական աշխատանքներ, ինչպես նաև կաջակցի Թուրքիա-Հյուսիսային Կիպրոսի թուրքական հանրապետություն խմելու ջրի խողովակաշարի անցկացման երթուղու որոշմանը։
Նավը նաև հետևելու է ծովի աղտոտվածությանը և ծովի հատակով անցնող խողովակաշարերի դրությանը։
Հիշեցնենք, որ Թուրքիայի ծովային սահմանների երկարությունը կազմում է 8333 կիլոմետր։
