Վրաստանը Հայաստանին օգնություն է առաջարկում կորոնավիրուսի համավարակի հաղթահարման գործում: «Առաջին լրատվական»-ի հետ թեմայի շուրջ զրույցում քաղաքագետ Ստեփան Գրիգորյանը նշեց, որ բացի կառավարական մակարդակից՝ Վրաստանում տարբեր քաղաքական ուժեր ու հասարակական կազմակերպություններ սկսել են Հայաստանին աջակցելու նախաձեռնությամբ հանդես գալ: Դա բարեկամական ժեստ է: Համաճարակային իրավիճակը եթե բարդանա, մենք կունենանք լուրջ խնդիրներ նաև միջազգային հանրության հետ առնչվելիս: Կան եվրոպական երկրներ, որոնք հայտարարել են, որ խորհուրդ չեն տալիս իրենց քաղաքացիներին մուտք գործել Հայաստան, դա նշանակում է, որ մեզ մոտ բարդ վիճակ է, և աջակցությունը Հայաստանին խրախուսելի է: Մեր կառավարությունը չպետք է ամաչի, պետք է տագնապ հայտարարի և միջազգային հանրությանը խնդրի լրջագույնս աջակցել՝ և՛ մասնագետներով, և՛ սարքավորումներով: Հայաստանը ունի սակավ ռեսուրսներ, հիմա ծանր է վիճակը, պետք է դիմի օգնության»:
Երևանի մամուլի ակումբի նախագահ Բորիս Նավասարդյանի կարծիքով նույնպես, անշուշտ, պետք է բռնել Վրաստանի՝ բարեկամաբար մեկնած ձեռքը: «Եթե հնարավորություն կա որևէ օգնությունից օգտվելու, պետք է օգտվել: Վրաստանի քայլը դրական է, մենք միայն շնորհակալ պետք է լինենք… Եթե որևէ երկիր կարողանում է օգնել իր հարևան երկրին, դրանով բարձրանում է նաև նրա միջազգային հեղինակությունը»:
Մեր այս բարդ վիճակում, երբ Վրաստանն աջակցության պատրաստակամություն է հայտնում, մեր մյուս բարեկամ երկիրը՝ Ռուսաստանը առաջարկում է գազի գինը թանկացնել: Անդրադառնալով այս դիտարկմանը՝ Ստեփան Գրիգորյանն ընդգծեց. «Ռուսաստանը միշտ էլ ծանր պահերին մեզ «քցում էր». հիշենք՝ երբ Վանի հերոսական ճակատամարտի ժամանակ, երբ ժողովուրդը պայքարում էր թուրքերի դեմ, 10-20 կմ հեռավորության վրա գտնվող ռուսական զորքերը չեկան, չաջակցեցին, մինչդեռ պարտավոր էին… Ռուս ժողովուրդը հոյակապ ժողովուրդ է, բայց իշխանությունը, պետական համակարգը հիմնված է շահերի վրա և այսպիսի քայլեր է անում: Գազի գնի թանկացման հարցում ես շանտաժի տարրեր տեսա, Ռուսաստանի այսօրվա իշխանություններից ամեն ինչ կարելի է սպասել»:
Բորիս Նավասարդյանի դիտարկմամբ՝ մի քանի հանգամանք կա. «Որքան էլ Ռուսաստանը և Հայաստանը առանձին իրավիճակներում կարող են ունենալ համատեղ նպատակներ, Հայաստանի նոր իշխանությանը Ռուսաստանում չեն համարում բարեկամական… Եվ եթե ստեղծվում է իրավիճակ, երբ կարելի է ճնշում գործադրել Հայաստանի իշխանության նկատմամբ, այդ հնարավորությունից Ռուսաստանը երբեք չի հրաժարվում, և այդ հնարավորությունն այսօր կա: Երկրորդ հանգամանքն այն է, որ Ռուսաստանը Հայաստանից ակնկալում է ստանալ օգուտ, բայց Հայաստանն այս պահին համարյա ոչինչ չի կարող առաջարկել Ռուսաստանին, և Ռուսաստանը իր գազային քաղաքականությունը այնպես է զարգացնում, որ մեզ համար խնդիրներ առաջանան, երրորդ՝ նախագահ Պուտինը հայտարարեց, որ այդ հարցում պետք է հենվել շուկայական սկզբունքների վրա… Սա տարօրինակ հայտարարություն է»:
Մանրամասն՝ տեսանյութում:
