Ազգային ժողովում երեկ ՀՀ էկոնոմիկայի նախարար Տիգրան Խաչատրյանը ներկայացրեց նախարարության 2019թ. և 2020թ. առաջին 4 ամսվա գործունեության աշխատանքը:
«2020թ. անելիքների առումով մենք վերանայման փուլի ընթացքի մեջ ենք»,- «Առաջին լրատվական»-ի հետ զրույցում նշեց նախարարը,- կորոնավիրուսի համաճարակով պայմանավորված փոփոխությունները չէին կարող չազդել նախարարության մոտեցումների վրա, թեև նպատակները նույնն են՝ ունենալ մրցունակ տնտեսություն, որը տեխնոլոգիապես զինված կլինի. կառավարությունն անելիքներ ունի, որպեսզի ունենանք մրցունակ, արտադրողական տնտեսություն… Ներկա վիճակի դժվարությունն այն է, որ փոփոխություններն ավարտված չեն ամբողջ աշխարհում, մարտահրավերներ ունենք ինչպես երկրի ներսում, այնպես էլ դրսում»:
«Ներմուծման և արտահանման ծավալների նվազում ունենք, որը պայմանավորված է համավարակի գործոնով: Մենք ունեցանք պահանջարկի շոկ, հետո առաջարկի շոկ,- ընդգծեց էկոնոմիկայի նախարարը՝ հավելելով, որ հաջորդաբար այս երկու շոկերն այնպիսի դժվարություններ են առաջացնում տնտեսության համար, որպիսին երբևէ չի եղել»:
Տիգրան Խաչատրյանի խոսքով՝ տնտեսական ակտիվությունը կարող է վերականգնվել, երբ որ համաճարակի ռիսկերն էապես կրճատվեն և առօրյայում քաղաքացիները պահպանեն անհրաժեշտ պարզ կանոնները, որոնք նախ իրենց և իրենց հարազատների համար են կարևոր, և հետո ուղիղ ազդեցություն ունեն նաև այն կազմակերպության տնտեսական արդյունքների վրա, որտեղ աշախատում են:
Էկոնոմիկայի նախարարը նաև տեղեկացրեց, որ Կառավարության աջակցության 19-րդ միջոցառումը նախատեսված է զրոյից բիզնես սկսողների համար: Նախախարի դիտարկմամբ՝ բիզնեսի համար ամենակարևոր գործոնը կանխատեսելիությունն է:
Մանրամասն՝ տեսանյութում: