Ազգային ժողովում առաջին ընթերցմամբ ընդունվել է «Հանրաքվեի մասին օրենքում փոփոխություններ կատարելու վերաբերյալ» նախագիծը: Այսօր խորհրդարանը լսել է նաև ՀՀ գլխավոր դատախազին:
Թեմայի շուրջ «Առաջին լրատվական»-ի հետ քննարկմանը մասնակցեցին «Քաղաքացու որոշում» կուսակցության գործադիր մարմնի անդամ Գոռ Հակոբյանը, քաղաքագետ Արմեն Վարդանյանը և փաստաբան Գևորգ Դավթյանը:
Անդրադառնալով նախագծի իրավական հիմքերի ամուր լինել-չլինելուն՝ Գևորգ Դավթյանը նշեց, որ իրավունքը լայնածավալ է, և եթե նախագիծն ունի օբյեկտիվ հիմնավորումներ, ապա կարող են այսպիսի փոփոխություններն արդարացված լինել. «Հանրաքվեն հետաձգվեց՝ համաճարակով պայմանավորված, և քանի որ համաճարակը կարող է երկար ժամանակ տևել, բնական է, որ ՍԴ խնդրի լուծումը տեղափոխվել է Աժ»: Փաստաբանի կարծիքով՝ այս նախագծով նախատեսված փոփոխությունները երկրում արամատական փոփոխությունների կբերեն:
Արմեն Վարդանյանի դիտարկմամբ՝ այս նախագիծը ավելի խճճեց իրավիճակը: «Տեսանելի չէ, թե որն է լինելու իշխանության հաջորդ քայլը ՍԴ ճգնաժամը լուծելու ուղղությամբ: Իշխանությունն այս պահին սպասողական վիճակում է. սպասում են Վենետիկի հանձնաժողովի փորձագիտական կարծիքին»,- նշեց քաղաքագետը:
Գոռ Հակոբյանի խոսքով՝ հանրաքվեն չեղարկելը ճիշտ որոշում կլինի, բայց եթե անգամ ԱԺ-ում լուծվի ՍԴ խնդիրը, նորից օդից կախված է մնալու ՍԴ անկախության խնդիրը:
Հարցին, թե արդյոք այս նախագծի ընդունումը ճանապարհ է հարթում դեպի ՍԴ ճգնաժամի հանգուցալուծում, Գևորգ Դավթյանը նշեց. «Որոշակի առումով այո, բայց ոչ ամբողջական. սա հետքայլ չէ, այլ քայլ է դեպի առաջ, բայց ոչ մեծ քայլ»:
Քննարկման մասնակիցները նաև ընդգծեցին, որ Սահմանադրական դատարանը լեգիտիմ չէ, և անհրաժեշտ է օր առաջ լուծել ՍԴ շուրջ ստեղծված ճգնաժամը:
Մանրամասն՝ տեսանյութում: