Ազգային ժողովում այսօր քննարկվում էր «Հանրաքվեի մասին» սահմանադրական օրենքում փոփոխությունների նախագիծը: Արտակարգ դրության պայմաններում հանրաքվեն չեղարկելու մասին օրենսդրական նախաձեռնության հեղինակը «Իմ քայլը» խմբակցությունն է: Նախագծի նպատակն է լուծել Սահմանադրական դատարնի շուրջ ստեղծված ճգնաժամը:
Թեմայի շուրջ «Առաջին լրատվական»-ի հետ քննարկմանը մասնակցեցին «Քաղաքացու որոշում» կուսակցության գործադիր մարմնի անդամ Նարեկ Ներսիսյանը, «Անտարես» հրատարակչության տնօրեն Արմեն Մարտիրոսյանը և ՀԱԿ իրավական հարցերի պատասխանատու Արմեն Խաչատրյանը:
Նարեկ Ներսիսյանի դիտարկմամբ՝ այս նախաձեռնության նպատակը անհասկանալի. «Լուրջ գումարներ ներդրվեցին հանրաքվեի համար…, և հիմա նորից անցել են օրենսդրական նախաձեռնության, սա իրավական տեսակետից իրական չի լինելու, որովհետև այս Սահմանադրության պայմաններում, միևնույն է, Սահմանադրական դատարանի եզրակացությունը անհրաժեշտ է. երկրորդ ընթերցումից հետո նախագիծը պետք է ուղարկվի ՍԴ, և եթե ՍԴ եզրակացությամբ նախագիծը չի համապատասխանում սահմանադրականությանը, ապա պետք է շրջանառությունից դուրս գա: Սահմանադրական դատարանի հարցը լուծելու միակ ուղին Սահմանադրության լեգիտիմության հարցը վերջնականապես լուծելն և նոր՝ իրական Սահմանադրությամբ հարցը կարգավորելը: Դեռ ուշ չէ, պետք է զբաղվել նոր Սահմանադրության մշակմամբ»:
Արմեն Խաչատրյանը հավելեց, որ համակարծիք է՝ անհրաժեշտ է գնալ սահմանադրական փոփոխությունների՝ շատ մեծ փաթեթով: Նրա խոսքով՝ համավարակի պայմաներում հանրաքվե չանցկացնելը տրամաբանական է. «Գործող Սահմանադրությամբ նախատեսված է, որ արտակարգ դրության և ռազմական դրության պայմաններում հանարքվե չպետք է անցկացնել… Ազգային ժողովի քվեարկությամբ պետք է հաղթահարվի ՍԴ առկա ճգնաժամը»:
«Մենք ընտրություններին մանդատ ենք տվել այս Ազգային ժողովին, իշխանությանը օժտել ենք ուժով, նրանք պետք է ամեն ինչից վեր կանգնեն ու անեն մեր ուզածը»,- ընդգծեց Արմեն Մարտիրոսյանը:
Կա տեսակետ, թե հանրաքվե չանցկացնելու և ՍԴ հարցը այս տարբերակով լուծելու վերաբերյալ խորհուրդ են տվել միջազգային կառույցները: «Սա մեր սուվերենության հարցն է, մեր «ինտիմ» խնդիրն է, չի կարելի նայել եվրոպաներին…»,- նշեց Արմեն Մարտիրոսյանը:
Անդրադառնալով «Ոստիկանության մասին օրենքի» փոփոխության նախագծին և դիտարկմանը, որ որոշակի դիմադրություն կա, Արմեն Մարտիրոսյանը նշեց. «Հեղափոխական իշխանությունը պետք է «կատոկով» անցնի դիմադրության վրայով, պետք է լինեն կադրային ջարդեր, համարձակ քայլեր, բարեփոխումներ»:
Արմեն Մարտիրոսյանը, անդրառնալով դիտարկմանը, որ քննարկվում է ոստիկանության լծակներն ավելացնելու, նոր մտածողությամբ զինելու հարցը, ընդգծեց. «Ոստիկանությանը պակասում է Վանո-2-ը, ու ոստիկանությունը կգործի: Ժողովրդի լեզվով ասած՝ ով է այդ պլոճիկով տղան, ասեք՝ դնենք նախարար: Ով է այն ուժը, որ պիտի կարողանա միշիկների, վանեցյանների, հների կերածը հետ բերել, դա թավշյա ճանապարհով չի կարող լինել, պետք է օրինական կոշտություն ցուցաբերել… Վարչապետը չի կարող այս հարցով էլ զբաղվել, նա պետք է զբաղվի Հայաստանի զարգացման գլոբալ հարցերով»:
Մանրամասն՝ տեսանյութում:
