Իրանի պաշտպանության նախարար Ամիր Հաթամին հաղորդել է, որ Ուկրաինայի միջազգային ավիաուղիների ինքնաթիռի ավիաաղետի մեղավորը հրթիռային համակարգի օպերատորն է: Այս մասին հաղորդել է իրանցի պատգամավոր Մահմուդ Սադեկին՝ գրում է RadioFarda-ն:
Պատգամավորը հաղորդում է, որ հարցումով դիմել է նախարարի գրասենյակ և գերատեսչության ղեկավարի կողմից ստացել է գրավոր պատասխան: Սադեկիի խոսքով՝ ելնելով նախարարի պաշտոնական բացատրությունից՝ հրթիռային համակարգի օպերատորը «հրթիռն արձակելիս հավանաբար չի հաղորդակցվել հրամանատարական կենտրոնի հետ՝ հույսը դնելով պաշտպանության նախարարության ոչ ճշգրիտ տեղեկատվության վրա»:
Սադեկին հայտնել է, որ նախարարին հարցումն ուղարկել է ապրիլի 23-ին և պատասխանը ստացել մայիսի 22-ին:
Պատգամավորը նշել է նաև, որ ցանկացել է Իրանի պաշտպանության նախարարից ստանալ բացատրություն հակաօդային պաշտպանության ազգային ցանցում համակարգման բացակայության պատճառի մասին, ինչը հանգեցրել է Թեհրանի երկնքում ուկրաինական ուղևորատար ինքնաթիռի ուղղությամբ երկու հրթիռի արձակման:
