Թուրքական Radikal թերթի փոխանցմամբ՝ ավելի քան 10 օր է, ինչ իրանական բանակը պատժիչ գործողություններ է իրականացնում «Քրդստանի ազատ կյանք» կուսակցության (PJAK) զինյալների դեմ, որը համարվում է Թուրքիայում ահաբեկչական հռչակված և արգելված «Քրդստանի աշխատավորական» կուսակցության (PKK) իրանական թևը։
Իրանական բանակի պատժիչ գործողություններին մասնակցում են հազարավոր իրանցի զինծառայողներ։ Իրանա-իրաքյան սահմանին ծավալված գործողությունների արդյունքում իրանական բանակը հատել է սահմանը և մոտ 4 կիլոմետր խորությամբ առաջ շարժվել։
PJAK-ի զինյալները նահանջել են Ղանդիլի լեռը, ուր գտնվում են PKK-ի ճամբարները։ Իրանական բանակը ձերբակալել է Իրաքի երկու քաղաքացու, վիրավորվել է երկու հովիվ։
Հյուսիսային Իրաքում գտնվող Քրդական ինքնավարության ղեկավարությունը դիմել է Բաղդադի կենտրոնական իշխանությանը՝ իրանական օպերացիային ու ռմբակոծություններին վերջ դնելու համար։
Հիշեցնենք, որ վերջին 15 տարիների ընթացքում թուրքերը մեկ անգամ չէ, որ փորձել են ծնկի բերել Հյուսիսային Իրաքում բազավորված PKK զինյալներին: Ամեն անգամ արդյունքը եղել է նույնը. թուրքական բանակը հպարտ կեցվածքով հեռացել է Իրաքից, իսկ PKK-ի զինյալները կարծես հրաշքով գոյատևել են:
Ի դեպ, հուլիսի 9-ին էլ քուրդ զինյալների դեմ պայքարի նպատակով թուրքական բանակի ստորաբաժանումներն էին (8 ռազմական փոխադրամիջոց) մտել Իրանի տարածք։
