Կորոնավիրուսի համավարակով պայմանավորված իրավիճակի, դրա տնտեսական հետևանքների, նոր մարտահրավերների հաղթահարման ուղիների քննարկման նպատակով Հանրապետության նախագահ Արմեն Սարգսյանը հանդիպումների շարք է նախաձեռնել խորհրդարանական և արտախորհրդարանական ուժերի, հասարակական կազմակերպությունների, տարբեր ոլորտների մասնագետների հետ: Այս շրջանակում նախագահ Սարգսյանն արդեն իսկ հանդիպում է ունեցել ՀՅԴ Հայաստանի գերագույն մարմնի ներկայացուցիչ Իշխան Սաղաթելյանի և ՀՅԴ Բյուրոյի անդամ Արսեն Համբարձումյանի հետ: Նախատեսվում են հանդիպումներ այլ ուժերի հետ ևս։
«Ժառանգություն» կուսակցության նախագահ Նարինե Դիլբարյանի կարծիքով՝ նմանատիպ քննարկումներն ու խորհրդակցությունները՝ հատկապես համավարակով պայմանավորված արտակարգ դրության պայմաններում, իսկապես կարևոր են: «Ճիշտ ձևաչափի պարագայում դրանք կարող են արդյունավետ լինել։ «Ժառանգություն»-ը մինչ այս պահը այդպիսի մի հանդիպում ունեցել է պարոն Սարգսյանի հետ, բայց նոր հանդիպման առաջարկ մենք դեռ չենք ստացել։ Եթե լինի այդպիսին՝ անպայմանորեն կմասնակցենք։ Ընդհանրապես «Ժառանգություն»-ը միշտ հանդես է եկել իշխանության տարբեր թևերի և պատասխանատուների հետ պարբերաբար հանդիպումներ ու քննարկումներ կազմակերպելու ձևաչափի օգտին»,- «Առաջին լրատվական»-ի հետ զրույցում ասաց նա։
Միևնույն ժամանակ մեր զրուցակիցն ընդգծեց՝ ակնհայտ է, որ մեկ ուժի միջոցով դժվար է հանրությանը անհանգստացնող բոլոր խնդիրների մասին անհրաժեշտ տեղեկատվությունն ունենալ. «Այսինքն՝ ողջունում ենք հանդիպումների նման ձևաչափն ու կարծում ենք, որ ճիշտ կլինի, եթե հանրապետության վարչապետը նույնպես նախաձեռնի այդպիսի հանդիպումներ՝ փաստորեն միավորելով քաղաքական այն ուժերին, որոնց նպատակն ինքնիշխան, ժողովրդավարական Հայաստանն է՝ համավարակից հնարավորինս պաշտպանված և տնտեսապես հզորացող»։
Կա՞ քաղաքական դաշտում ստեղծված իրավիճակի հետ կապված ընդհանուր պատկերացում՝ հարցին ի պատասխան Դիլբարյանը պատասխանեց. «Իհարկե, ոչ։ Խնդիրն այն է, որ ամեն քաղաքական ուժ և անգամ պարետատունը ունի իր մոտեցումը խնդիրների լուծման, դրանց ահագնացման վերաբերյալ, նույնը նաև կառավարությունը։ Մեկ պատկերացումն այն է, որ դատաիրավական ոլորտում այս մեխանիզմներ են պետք բարեփոխումներ անելու համար, հետո տեղի են ունենում այլ ազդեցություններ, ու պատկերացումները փոխվում են։ Այսինքն՝ մեր առաջընթացի գլխավոր վտանգն ու այս ձևավորված տեղապտույտն առաջանում են նրանից, որ բոլորն ունեն դրվագային պատկերացումներ երկիրը այս դժվարին իրավիճակից դուրս բերելու համար։ Բայց այդ դրվագները չեն ամբողջանում, ու մեր խնդիրները չեն լուծվում։ Այն գաղափարակից ուժերը, որոնք մասնակցեցին, ողջունեցին հեղափոխական փոփոխությունները, մերժեցին նախկին համակարգը՝ չմիավորվեցին, հակառակը՝ տեղի ունեցավ ջլատում, ցանկացած քննադատության պիտակավորում, թիրախավորում, կրքերի ավելորդ լարում։ Երբ գաղափարակից նույն ուժերի միջև առաջանում է հարաբերությունների այդպիսի դաշտ, ապա ձախողումը շատ մոտ ու առարկայական է դառնում»։
Արտախորհրդարանական ուժերից «Ժողովրդավարական հայրենիք» կուսակցության նախագահ Պետրոս Մակեյանն «Առաջին լրատվական»-ի հետ զրույցում ասաց, որ հանդիպման առաջարկ առայժմ չեն ստացել. «Չգիտեմ, թե ինչ դերակատարում կարող են ունենալ արտախորհրդարանական ուժերը կորոնավիրուսի հետ կապված՝ բացի քաղաքացիական պարտականությունների կատարումից, որոնք սահմանվել են պարետատան կողմից։ Եթե հրավեր լինի՝ մենք բնականաբար կընդունենք այն, բայց կուսակցությունների դերակատարումը շատ քիչ նշանակություն ունի այս հարցում»։
Միևնույն ժամանակ Մակեյանը նշեց, որ իրենք որոշել էին մարտի 1-ին համագումար անցկացնել, սակայն, այս իրավիճակով պայմանավորված, արդեն երեք ամիս է՝ զերծ են մնում: «Կուսակցությունների աշխատանքը փաստորեն պարալիզացված վիճակում է»,- եզրափակեց նա։