Երևանցիները ողջունում են առողջապահության նախարարության որոշումը, համաձայն որի՝ այսուհետև կորոնավիրուսով վարակակիրները, որոնց մոտ սիմպտոմներ չեն լինի, կամ կլինեն թույլ արտահայտված, այլևս չեն մեկուսացվի հիվանդանոցային կամ հյուրանոցային պայմաններում։ Այդ հիվանդները կմնան տանը և կբուժվեն այնպես, ինչպես սուր շնչառական վարակների դեպքում։ Քաղաքացիների խոսքերով՝ այդ որոշումը կայացվել է, քանի որ այլևս հիվանդանոցային, մահճակալային ֆոնդը սպառվել է, կամ շուտով կսպառվի։ Բացի դրանից՝ հնարավոր կլինի բավականին միջոցներ խնայել և այդ միջոցները ծախսել ավելի ծանր ախտանշաններով հիվանդների վրա։
Բացի դրանից՝ մեր հարցման մասնակիցները մատնանշում էին եվրոպական տարբեր երկրների օրինակը, որտեղ հիվանդանոցներում մեկուսացնում են հիմնականում ռիսկային հիվանդներին և երիտասարդ տարիքի այն հիվանդներին, որոնց մոտ հիվանդությունը ծանր է արտահայտվում։ «Ամեն ինչ մեզնից է կախված, մեր կարգապահությունից, մեր հիգիենայից, մեր ուշադրությունից։ Նախարարությունը ոչինչ չի կարող անել, եթե մենք կարգապահ չլինենք, հետևողական չլինենք։ Այս օրերին հաճախ կարելի է լսել, թե սուտ է վարակը, չկա նման բան, դա բարի մարդկանց չի կպնում, սովորական գրիպ է և նման շատ այլ մտքեր։ Բայց պետք է լուրջ վերաբերել այս վարակին, լինել կարգապահ։ Մեզնից շատ բան է կախված»,- ասաց մի քաղաքացի՝ հավելելով, որ նախարարության որոշումը շատ ճիշտ է։
Առավել մանրամասն՝ տեսանյութում։
