Լեհաստանի Զամբիցե քաղաքում 17-րդ դարի եկեղեցու պտտահողմերի սրածայրում շինարարները ժամանակի պարկուճ են գտել, որը թվագրվում է 1797 թվականով: Այս մասին հայտնում է Daily Mail- ը:
Եկեղեցում վերանորոգման աշխատանքների ընթացքում հայտնաբերվել է անցյալից մի հաղորդագրություն: Ներսում, քաղաքային իշխանությունները գտել են ավելի քան 200 տարեկան հին մետաղադրամներ և գերմաներենով գրված փաստաթղթեր: XVIII դարում քաղաքը կոչվում էր Մյունստերբերգ և Պրուսիայի Թագավորության մաս էր կազմում:
Քաղաքապետ Մարիուս Շպիլարևիչն ասել է, որ «ամեն ինչ ցույց է տալիս, որ սա կարող է աշխարհի ամենահին ժամանակի պարկուճներից մեկը լինել»:
Գտած փաստաթղթերը վերաբերում են եկեղեցու կառուցմանը, որը կառուցվել է 1797-ին՝ 15-րդ դարի դղյակի տեղում: Նրանք նշում են աշխատանքներում ներգրավված մարդկանց անունները, և նրանց, ովքեր գումար են նվիրաբերել շինարարությանը:
Այնտեղ կան նաև 1902-1903 թվականների փաստաթղթեր և լուսանկարներ: Ըստ քաղաքային պաշտոնյաների՝ դրանք խիստ վնասված են:
Մասնավորապես, հայտնաբերվել է 1902 թվականի օգոստոսի 20-ի Münsterberger Zeitung թերթը և ավետարանական աղոթքի գրքեր: Պարզվել է, որ թղթերից մեկը գրություն է այն երկու կանանցից, ովքեր գումար են նվիրել եկեղեցու կառուցման համար:
«Այդ մարդիկ ուզում էին մեզ ասել, որ իրենք այստեղ են եղել, իրենց սրտերն ու կյանքը ներդնել են շինարարության մեջ, և հիմա մենք պետք է շարունակենք իրենց գործը և հոգ տանենք նրանց թողածի մասին», – ասաց քաղաքապետը:
Փաստաթղթերն ամբողջությամբ թարգմանվելու և պահպանվելու են, որից հետո դրանք կներկայացվեն որպես թանգարանային նմուշներ:
Աշխարհի ամենահին պարկուճը նույնպես 18-րդ դարից է և գտնվել է ԱՄՆ-ի Բոստոն քաղաքում: Լեհաստանի պարկուճը երկու տարով ավելի նոր է, քան Բոստոնինը:
