Վարչապետ Նիկոլ Փաշինյանը ապրիլի 24-ին, Ծիծեռնակաբերդից իր խոսքն ուղղելով Հայաստանի, Արցախի և աշխարհասփյուռ հայությանը, կարևորել էր համահայկական հայեցակարգի և գաղափարախոսության ստեղծումը և նշել, որ այդպիսի հայեցակարգի նախագիծ կներկայացնի քննարկման: «Առաջին լրատվական»-ի հետ զրույցում անդրադառնալով հարցին, թե ինչը պետք է լինի նման հայեցակարգի հիմքում, «Թուֆենկյան» բարեգործական հիմնադրամի գործադիր տնօրեն Րաֆֆի Դուդակլյանը նշեց, որ վաղուց խոսվում է այդպիսի հայեցակարգի մասին, սակայն դեռևս վերջնական հստակեցված հայեցակարգ չունենք:
«Կառաջարկեի, որ վարչապետը հայեցակարգի քննարկումը սկսեր քաղաքական ուժերի, հասարակական տարբեր խմբերի հետ՝ տարբեր ձևաչափերով, որպեսզի հասկանալի լիներ բոլորի համար: Սփյուռքահայության մի մասի համար համահայկականության խնդիր կարող է լինել Ցեղասպանության ճանաչման և հատուցման օրակարգը, հայության մի հատվածի համար այդպիսի խնդիր կարող է լինել Արցախի հարցն ի նպաստ հայության լուծելը, մեկ այլ հատվածի համար կարող է լինել Հայաստանի տնտեսության հզորացումը առաջնային դարձնելը: Կարծում եմ՝ հայեցակարգը պետք է ընդգրկի մի քանի լուրջ թեմաներ»:
Անդրադառնալով ներքաղաքական զարգացումներին և դիտարկմանը, որ Հայաստանի ներսում ճգնաժամ է, ըստ տարբեր փորձագետների ու վերլուծաբանների հայտնած կարծիքների՝ հոգեբանական տեռոր է իրականացվում ներկայիս իշխանությունների նկատմամբ, որի նպատակը դաշտը ապակայունացնելն է և կառավարման ճգնաժամ հրահրելը: Այդքան էլ համաձայն չեմ, որ հոգեբանական տեռոր է տեղի ունենում, կարծում եմ՝ տեղի ունեցողը տեղեկատվական տեռոր է: Իշխանությունը պետք է կարողանա դիմադրել հոգեբանական դավադիր, դարանակալ աշխատանքներին ու ծուղակներին: Ընդդիմության գործը իշխանությանն անկյուն հրելն է: Ինչքան էլ որ նախկիններն ասեն՝ հալածված ենք, ստախոս են, նրանք ունեն ամենաշատ հնարավորությունները՝ թե՛ մեդիայի, թե՛ գումարների առումով, նրանց ունեցած գումարն ավելի շատ է, քան Հայաստանի բյուջեն: Իրենց խոհանոցային «լայվ»-երին որևէ մտածող մարդ չի հավատում: Ակնկալում եմ, որ իշխանությունը կարողանա դիմակայել և սադրանքների չգնալ»:
Մանրամասն՝ տեսանյութում: