Եվրամիությունը հայտարարել է, որ «Արևելյան գործընկերության» անդամ երկրների հետ առանց այցագրի ռեժիմի մասին բանակցություններ կսկսի միայն որոշակի պայմանների կատարման դեպքում: Այս մասին հաղորդում է Interfax գործակալությունը՝ վկայակոչելով «Արևելյան գործընկերության» քաղաքականության մասին ԵՄ Խորհրդի հրամանագիրը: Եվրամիությունը մտահոգված է, որ ապաստան տրամադրելու վերաբերյալ մեծ թվով դիմումներ են ստանում որոշ գործընկեր երկրների քաղաքացիներից: ԵՄ կարճատև այցեր կատարելու նպատակով առանց վիզայի ռեժիմից օգտվում են «Արևելյան գործընկերության» երկրներից Վրաստանը, Մոլդովան և Ուկրաինան, իսկ Հայաստանի, Բելառուսի և Ադրբեջանի քաղաքացիներին Եվրամիության տարածք մուտք գործելու համար մուտքի արտոնագրեր են անհրաժեշտ: Խորհուրդն ընդգծում է, որ եթե պայմանները թույլ տան, ապա առաջիկայում կքննարկվի վիզային ռեժիմի ազատականացման վերաբերյալ բանակցություններ սկսելու հնարավորությունը: Հայտարարության համաձայն՝ պայմանները, մասնավորապես, ներառում են գործող ճանապարհորդական ռեժիմի պահպանում, վիզաների դյուրացման և ռեադմիսիայի համաձայնագրերի կիրառում:
Մարդկային զարգացման միջազգային կենտրոնի նախագահ, քաղաքագետ Թևան Պողոսյանի կարծիքով՝ Հայաստանի հետ առանց վիզային ռեժիմի շուրջ երկխոսությունը պետք է սկսված լիներ դեռ 2018 թվականի ավարտին: «Բայց եղան քաղաքական փոփոխություններ, Եվրամիությունն էլ ժամանակ վերցրեց, քանի որ իրենց մոտ ևս ընտրություններ էին։ Հիմա էլ կորոնավիրուսը կհետաձգի այդ հարցը։ Բայց այն, որ ժամանակին Հայաստանը անցել էր շատ մեծ ճանապարհ ու պատրաստ էր, որ Եվրոպական խորհուրդը ընդուներ քաղաքական որոշում, Եվրոպական հանձնաժողովին էլ տար մանդատ, որ Հայաստանի հետ սկսեն նախապատրաստել բանակցությունների սկզբնական փուլը՝ ակնհայտ է։ Իսկ թե այժմ երբ կսկսվի այդ երկխոսությունը՝ դժվարանում եմ ասել, որովհետև ի վերջո Եվրոպական խորհուրդը պետք է քաղաքական որոշում ընդունի»,- «Առաջին լրատվական»-ի հետ զրույցում ասաց նա։
Միևնույն ժամանակ մեր զրուցակիցն ասաց՝ Հայաստանն արդեն շատ չափանիշներով պատրաստ էր, ու եթե արագ տեմպերով կարողանայինք հասնել որոշակի խնդիրների լուծմանը՝ 2018-ի ավարտին հնարավոր էր սկսել այդ երկխոսությունը. «Պարզապես պետք է գիտակցել, որ եվրոպացիները քաղաքական դիտարկումներ են անում։ Ապրիլ-մայիսին եղան փոփոխություններ, դեկտեմբերին եղան ընտրություններ, նոր կառավարությունը մինչև ձևավորվեց՝ այնտեղ ընտրությունների ժամանակ եղավ։ Այո՛, կարելի է խոսել նաև բաց թողնված հնարավորությունների մասին, բայց պետք է հասկանանք, որ քաղաքական որոշման հասնելու համար անդամ բոլոր 28 երկրները պետք է համաձայնություն տան»։
Պողոսյանն արձանագրում է՝ մեկ անգամ չէ, որ նշվել է, որ կան երկու-երեք երկրներ, որոնք Հայաստանի նկատմամբ ունեն վերապահումներ. «Քաղաքական բանակցություններում այդ վերապահումները պետք է հարթել, որ այդ որոշումը կայացվի։ Հույս ունենալ, որ կորոնավիրուսի այս պայմաններում շատ արագ կերպով հնարավոր կլինի հաջողության հասնել՝ այնքան էլ տեղին չէ։ Միգուցե սա դժվար է, բայց մենք ունենք այսօրվա դրությամբ ավելի շատ ոչ թե տեխնիկական խնդիրներ, այլ մի քանի անդամ երկրների հետ քաղաքական խնդիրներ։ Պետք է այդ դիմադրությունը հաղթահարենք ու հաջողություն գրանցենք։ Թե ինչքան ժամանակ կպահանջվի՝ կախված կլինի հայկական կողմի վարած բանակցություններից։ Տեխնիկական իմաստով բոլոր խոչընդոտները հաղթահարված են, այդ թվում՝ ռեադմիսիայի պայմանագրի հետ կապված հարցերը»։
Արդյոք որոշ երկրների հետ է պահում նաև Հայաստանի՝ ԵԱՏՄ և ՀԱՊԿ անդամ լինե՞լը՝ հարցին ի պատասխան Թևան Պողոսյանն ասաց. «Ո՛չ, խնդիրն այդ ինստիտուտների հետ չէ։ Խնդիրը Հայաստանի Հանրապետության և կոնկրետ ԵՄ անդամ որոշ երկրների հետ է։ Եթե լիներ նմանատիպ խնդիր, ապա պետք է 2013-ից հետո ասեին, որ Հայաստանի հետ նման բան անհնար է, որովհետև դուք դարձաք ԵԱՏՄ անդամ։ Բայց նման բան չեն ասել։ Խնդիրն այլ դաշտերում ման գալ պետք չէ, պետք է գիտակցել, որ սա կոնկրետ մի քանի երկրների հետ տարվող քաղաքական բանակցության հարց է։ Պետք է աշխատենք, որ կարողանանք դրական արդյունքի հասնել»։
