Պետք է ուսումնասիրություններն ամբողջության ու լրիվության սահմաններում իրականացվեն, որպեսզի մաքսանենգ ծխախոտի թեման այլևս չշահարկվի՝ որպես իշխանությանը վարկաբեկելու ու լեգիտիմությունը մաշեցնելու միջոց: Այս մասին ԱԺ ճեպազրույցների ժամանակ ասաց «Իմ քայլը» խմբակցության պատգամավոր Անդրանիկ Քոչարյանը՝ անդրադառնալով Միքայել Մինասյանի այն հայտարարությանը, թե մաքսանենգ ճանապարհով արտահանված ծխախոտի հետ կապ ունեն Նիկոլ Փաշինյանի մերձավորները:
Բայց եթե մաքսանենգ չէ, այդ դեպքում լրիվ ուրիշ պատմություն է, նշանակում է հատուկ կերպով փորձ է արվում վարկաբեկել իշխանությանը: Ըստ Քոչարյանի՝ պարզվում է, որ միայն Հրաչ Հակոբյանը անունը չէ, որ կապվում է այդ դեպքի հետ, նաև Սիփան Փաշինյանի անունն է շրջանառվում:
«Ինչ ասես մտցնում են այդ պատրաստված նյութերի մեջ: Եթե դա իրոք մաքսանենգ ապրանք է, պետք է Ռուսաստանի Դաշնությունից տեղափոխվի ՀՀ իրավական համակարգ: Բայց այդպիսի գործընթաց չենք տեսնում: Դա սուտ տեղեկատվություն էր, որի նպատակը ես նշեցի, թե որն էր: Առայժմ մեր իրավապահները չեն ստացել ՌԴ-ից մաքսանենգ ապրանքի մասին տեղեկատվություն, բացի այն պատրաստված հոդվածները, որոնք կասկած են հարուցում, թե ինչքանով առնչություն ունեն իրավապահ համակարգի հետ»,- ասաց նա: