Մայիսի 10-ին Թուրքիայում կորոնավիրուսից (Covid-19) մահացել է 47 մարդ։ Թուրքիայի առողջապահության նախարար Ֆահրեթթին Քոջան այս մասին գրել է «Twitter» միկրոբլոգի իր պաշտոնական էջում։
Նախարարը նշել է, որ 1 օրվա ընթացքում անցկացված 36․187 թեստերի արդյունքում հաստատվել է կորոնավիրուսով վարակվելու 1․542 նոր դեպք։ Նույն ժամանակահատվածում գրանցվել է վարակակիրների մահվան 47 դեպք, իսկ ապաքինվել է 3․211 մարդ։
Պաշտոնական տվյալների համաձայն` Թուրքիայում մինչ օրս համավարակից ապաքինվել է 92․691 հիվանդ, իսկ 1․154 հիվանդ էլ գտնվում է վերակենդանացման բաժանմունքում։
Այսպիսով, ըստ վերջին տվյալների՝ Թուրքիայում գրանցվել է վարակման 138.657 դեպք և մահվան 3․776 դեպք։ Կատարված թեստավորումների թիվը հասել է 1․370․598-ի։
Թուրքիայում կորոնավիրուսի պիկը գրանցվել է ապրիլի վերջին։ Այժմ երկրում կորոնավիրուսի վարակման դեպքերի թիվն աստիճանաբար նվազում է։
Հիշեցնենք, որ Թուրքիայում պաշտոնական տվյալներով` կորոնավիրուսով վարակվելու առաջին դեպքը հաստատվել է մարտի 11-ին, իսկ մահվան առաջին դեպքը՝ մարտի 17-ին։ Թուրքիան կորոնավիրուսով վարակման դեպքերի թվով տարածաշրջանում առաջ է անցել Իրանից։
