Թուրքական Akşam թերթի փոխանցմամբ՝ թուրքական բանտերում գտնվող 70 լրագրողներ պատրաստվում են բանտում հրապարակել Tutuklu Gazete («Ձերբակալված թերթ») լրագիրը։ Այս գաղափարի հեղինակը լրագրող Ադանըրն է։
Պլանավորված է, որ թերթի առաջին համարը լույս կտեսնի հուլիսի 24-ին։ Այն անվճար կհասնի ընթերցողներին։
Լրագրողները ցանկանում են թերթի միջոցով համայն աշխարհին ազդարարել, որ բանտում իրենց հայտնվելու միակ պատճառն իրենց լրագրողական գործունեությունն է։
Հիշեցնենք, որ ապրիլի սկզբին Մամուլի միջազգային ինստիտուտը (IPI) հայտարարեց, որ ձերբակալված լրագրողների ցուցանիշով Թուրքիան աշխարհի բացարձակ առաջատարն է.
«Ներկայումս թուրքական բանտերում են գտնվում 57 լրագրողներ: Այդպիսի իրավիճակ չկա աշխարհի որևէ այլ երկրում: Նախորդ տարվա դեկտեմբերի դրությամբ 1-ին տեղը միմյանց միջև էին կիսել Չինաստանն ու Իրանը՝ 34-ական ձերբակալված լրագրողներով»:
Իսկ 2010 հոկտեմբերի 20-ին «Լրագրողներ առանց սահմանների» (RSF) կազմակերպության հրապարակած զեկույցում Թուրքիայում խոսքի և մամուլի ազատության մակարդակը որակվել էր աղետալի. խոսքի ազատության ցուցանիշով Թուրքիան աշխարհի 178 երկրների շարքում զբաղեցրել էր 138-րդ տեղը:
Սեպտեմբերի վերջին էլ Թուրքիայի նախագահ Գյուլը լրագրողի աշխատանքը որակել էր որպես շատ վտանգավոր՝ նշելով, որ վերջին շրջանում միայն «Զաման», «Թարաֆ», «Բուգյուն», «Ենի Շաֆաք», «Սթար» և «Վաքիթ» թերթերի դեմ անցկացվել է 3500 հետաքննություն:
