Հայաստանի հավաքականի և «Շախտյոր»-ի կիսապաշտպան Հենրիկ Մխիթարյանը, պատասխանելով ակումբի պաշտոնական կայքի հարցերին, նկատել է, որ Ստամբուլի «Շյուքրու Սարաջօղլու» մարզադաշտում տեղի ունեցածին անգամ «Ֆեներբախչե»-ի ֆուտբոլիստները չէին սպասում:
– Այնպիսի տպավորություն էր, որ բրազիլացիներն արդեն նման բան տեսել էին իրենց երկրում:
– Հնարավոր է. այնտեղ նույնպես կան երկրպագուներ, որոնց արարքները կարող են անմիջական ազդեցություն ունենալ հանդիպման ընթացքի վրա: Կարևոր չէ՝ ընկերակա՞ն էր այս հանդիպումը, թե՞ պաշտոնական: Մենք ցանկանում էինք շաբաթական երկու հանդիպում անցկացնել և հետզհետե ընկնել հունի մեջ, սակայն ստացվեց, որ խաղացինք ընդամենը 70 րոպե: Հուսով ենք, «Լիոն»-ի հետ խաղում նման բան չի լինի, քանզի մենք սեփական հարկի տակ ենք խաղալու, և չեմ կարծում, թե մեր երկրպագուներն այդպես կպահեն իրենց:
– Հանդիպման սկզբում թվաց` թուրք ֆուտբոլիստները չէին սպասում տրիբունաների նման ճնշմանը:
– Կարծում եմ` նրանք սպասում էին, որ երկրպագուներն ինչ-որ բողոքի ակցիաներ կանցկացնեն, սակայն դժվար թե որևէ մեկը պատկերացներ, որ նրանք այսպես կփչացնեին հանդիպումը:
– Եթե մի կողմ դնենք այս իրադարձությունները, ի՞նչ կասես մրցակցի խաղամակարդակի մասին:
– Բոլորս լավ ծանոթ էինք մրցակցին, թուրքական ակումբների խաղաոճին: Այստեղ էինք եկել ֆուտբոլ խաղալու և հաղթելու համար: Մեզ համար դա շատ կարևոր էր: Ստացվեց այնպես, որ հանդիպումը չավարտվեց, բայց կարող էր ավարտվել ինչպես մեր օգտին, այնպես էլ` մրցակցի:
– Հարազատներդ, մտերիմներդ արդեն զանգահարել են:
– Այո, մայրս էր նոր զանգահարել:
