Չիկագոյի համալսարանի մի խումբ գիտնականներ եկել են այն եզրակացության, որ հիբրիդային նյութերից պատրաստված դիմակներն ավելի լավ կպաշտպանեն կորոնավիրուսի ներթափանցումից, քան միայն մեկ գործվածքից պատրաստվածները, հաղորդվում է ACS Publications կայքում:
Նշվում է, որ բամբակից, մետաքսից կամ շիֆոնից պատրաստված դիմակները թույլ են տալիս 10 նանոմետրից մինչև 10 միկրոմետր մասնիկների ներթափանցում: Պարզվել է, որ վարակի ներթափանցման դեմ ամենաարդյունավետը բամբակի, շիֆոնի և բնական մետաքսի համադրությունն է: Նման գործվածքներից պատրաստված դիմակը ֆիլտրում է մասնիկների 80-99%-ը:
Բամբակից, շիֆոնից և մետաքսից պատրաստված դիմակը հատկություններով մոտ է N95 տիպի շնչառական դիմակներին: Մետաքսը և շիֆոնը էլեկտրաստատիկ պատնեշի դեր են կատարում, իսկ բամբակը՝ մեխանիկական պատնեշի: Բայց ավելի կարևոր է դիմակի ձևը, քանի որ անցքերի առկայության դեպքում ինքնարար դիմակների արդյունավետությունը ցածր կլինի:
